କଟକ: ଚୌଦ୍ବାର ରାଇସ ମିଲ ଛକର ୫୫ ନମ୍ବର ଜାତୀୟ ରାଜପଥ ନିକଟରୁ ଗୁଳି ଚଳାଇ ଟଙ୍କା ଓ ସୁନାଗହଣା ଲୁଟ ହୋଇଛି । ଏହି ଘଟଣାରେ ଦୁର୍ବୃତ୍ତମାନେ ଲାଲା ଲଳିତ ମୋହନ ସିଂହଙ୍କ ଉପରକୁ ଗୁଳି ଚଳାଇବାରୁ ସେ ଗୁରୁତର ଆହତ ହୋଇଛନ୍ତି । ଗୁରୁଡିଝାଟିଆ ଥାନା ଓ ଚୌଦ୍ବାର ଥାନା ପୋଲିସ ଘଟଣାସ୍ଥଳରେ ପହଞ୍ଚିବା ସହ ଲଳିତଙ୍କୁ କଟକ ବଡ ଡାକ୍ତରଖାନାରେ ଭର୍ତ୍ତି କରିଛନ୍ତି । ଲଳିତଙ୍କ ଘର ଢେଙ୍କାନାଳ ଟାଉନରେ ହୋଇଥିବାବେଳେ ସେ ଢେଙ୍କାନାଳ ବନଖଣ୍ଡ ଅଧିକାରୀଙ୍କ ଡ୍ରାଇଭର ଭାବରେ କାର୍ଯ୍ୟ କରୁଛନ୍ତି ।
ସୂଚନା ଅନୁସାରେ, ବନବିଭାଗ କର୍ମଚାରୀ ଲାଲା ଲଳିତ ମୋହନ ତାଙ୍କ ପରିବାର ସହ ଏକ ସୁଇଫ୍ଟ କାରରେ ଢେଙ୍କାନାଳ ଫେରୁଥିଲେ । ମହାନଦୀର ମଧୂସୁଦନ ସେତୁ ଓ ୫୫ ନମ୍ବର ଜାତୀୟ ରାଜପଥକୁ ସଂଯୋଗ କରୁଥିବା ରାସ୍ତାରେ ଦୁଇଜଣ ଦୁର୍ବୃତ୍ତ ତାଙ୍କ କାର ଆଗରେ ବାଇକ ଅଟକାଇଥିଲେ । ଏହାପରେ ଡ୍ରାଇଭରଙ୍କୁ ମୁଣ୍ଡକୁ ବନ୍ଧୁକରେ ପିଟି ଗାଡି ଚାବି ନେଇ ନେଇଯାଇଥିଲେ । ଏହା ପରେ ଅନ୍ୟ ଦୁର୍ବୃତ୍ତମାନେ ଗାଡିରେ ବସିଥିବା ମହିଳାମାନଙ୍କ ଠାରୁ ସୁନାଗହଣା ସହ ଟଙ୍କାବ୍ୟାଗ ଲୁଟିନେଇଥିଲା । ଏହାକୁ ବିରୋଧ କରିବାରୁ ଲାଲା ଲଳିତ ମୋହନ ସିଂହଙ୍କ ମୁଣ୍ଡକୁ ଜଣେ ଦୁର୍ବୃତ୍ତ ଗୁଳି ମାରିଥିଲା । ଏହାପରେ ଦୁର୍ବୃତ୍ତମାନେ ସେଠାରୁ ଫେରାର ହୋଇଯାଇଥିଲେ । ଏହାପରେ ପୋଲିସ ସେଠାରେ ପହଞ୍ଚି ଗୁରୁତରଙ୍କୁ ଉଦ୍ଧାର କରି କଟକ ଡାକ୍ତରଖାନାରେ ଭର୍ତ୍ତି କରିଛି ।
ଏହି ଲୁଟ ଓ ଗୁଳିମାଡ ସ୍ଥାନୀୟ ଅଞ୍ଚଳର ପ୍ରଥମ ଘଟଣା ବୋଲି ଜଣାପଡିଛି। ମହାନଦୀରେ ମଧୂସୁଦନ ସେତୁ ହେବାପରେ ଏ ଅଞ୍ଚଳରେ ରାହାଜାନି ବୃଦ୍ଧି ପାଇବାରେ ଲାଗିଛି । ତେଣୁ ସେ ଅଞ୍ଚଳରେ ରାତ୍ରି ପାଟ୍ରୋଲିଂ ପାଇଁ ଜୋରଦାର କରିବାକୁ ଲୋକେ ଦାବି କରିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
