କଟକ: ପୋଲିସ ହାତରେ ଧରାପଡିଲା ବାଇକ ଲୁଟେରା। କେବଳ ବାଇକ ନୁହେଁ ବରଂ ଗାଡିର ବ୍ୟାଟେରିକୁ ମଧ୍ୟ ଚୋରି କରି ବେପାର କରୁଥିଲେ ଏହି ଦୁଇ ଜଣ । ଏହି ଦୁଇଜଣ ହେଲେ କଟକର ପ୍ରକାଶ ଚୌଧୁରୀ ଓ ଗଞ୍ଜାମର ଦୟାନିଧି ନାୟକ ଓରଫ ଛୁଇଁ ।
ଦୀର୍ଘ ଦିନ ଧରି ଏହି ଅପରାଧ ଚଳାଇ ଆସୁଥିଲେ ଏହି ଦୁଇ ଜଣ । ଗତକାଲି (ଶୁକ୍ରବାର) ରାତିରେ ବାଲିକୁଦା ନିକଟରେ ଚେକିଂ ସମୟରେ ଏହି ଦୁଇ ଜଣଙ୍କୁ ଧରିଥିଲା ପୋଲିସ । ସନ୍ଦେହ ହେବା ପରେ ଉଭୟଙ୍କୁ ଥାନା ନେଇ ପଚରାଉଚରା କରିଥିଲା ସଦର ଥାନା ପୋଲିସ । ପରେ ସବୁ କିଛି ସତ ସମ୍ନାକୁ ଆସିଥିଲା । ଏହି ଦୁଇ ଜଣ କଟକର ଆଖପାଖ ଜିଲ୍ଲା ମାନଙ୍କରୁ 13 ଗୋଟି ବାଇକ ଚୋରି କରି ଅନ୍ୟତ୍ର ବ୍ୟବସାୟ ପାଇଁ ରଖିଛନ୍ତି । ଚୋରି ହୋଇଥିବା ସମସ୍ତ ବାଇକ ଜବତ କରିବା ସହ, ଗାଡିର ବ୍ୟାଟେରୀ ଓ ନଗଦ 8 ଲକ୍ଷ ଟଙ୍କା ଜବତ କରିଛି ପୋଲିସ । ତେବେ ଗିରଫ ପରେ ଉଭୟଙ୍କୁ କୋର୍ଟ ଚାଲାଣ କରାଯାଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
