ଚାକିରି ନିୟମିତ ଓ ଦରମା ବୃଦ୍ଧି ଦାବି, ଦାବି ପୂରଣ ନହେଲେ ଚୂଲିବନ୍ଦ ଚେତାବନୀ

ଦୁର୍ଦ୍ଦିନରେ ବିଦ୍ୟାଳୟରେ ରୋଷେଇ କରୁଥିବା ପାଚିକାଙ୍କ ପରିବାର । ଦରମା ବୃଦ୍ଧି ପାଇଁ ସରକାରଙ୍କ ନିକଟରେ ନିବେଦନ । ଦାବି ପୂରଣ ନହେଲେ ଚୂଲି ବନ୍ଦ ଆନ୍ଦୋଳନ କରିବେ ପାଚିକା । ଅଧିକ ପଢ଼ନ୍ତୁ

ନିଆଳି: ଦୀର୍ଘ ଦିନ ଧରି ସ୍ୱଳ୍ପ ଦରମା ଓ ଅସ୍ଥାୟୀ ଭାବେ କାର୍ଯ୍ୟ କରିବା ପରେ ପାଚିକା ସଂଘର ଚେତାବନୀ । ଚାକିରି ନିୟମିତ କରି ମାସିକ ୧୪ଶହ ଟଙ୍କା ବଦଳରେ ୨୬ ହଜାର ଟଙ୍କା ଲେଖାଏଁ ପ୍ରଦାନ କରିିବାକୁ ସରକରାଙ୍କୁ ଦାବି । ନିର୍ବାଚନ ପୂର୍ବରୁ ଦାବି ପୂରଣ ନହେଲେ ରାଜରାସ୍ତାକୁ ଓହ୍ଲାଇବାକୁ ଚେତାବନୀ । ଏଭଳି ଦାବି କରି ଏକାଠି ହୋଇଛନ୍ତି ଓଡ଼ିଶା ମିଳିତ ବିଦ୍ୟାଳୟ ପାଚିକା ସହାୟିକା ସଂଘ ।‌

ସୂଚନା ଅନୁସାରେ, ଖୋର୍ଦ୍ଧା ଜିଲ୍ଲାର ବାଲିଅନ୍ତା ବ୍ଲକର ଦୁଲ୍ଲାଦେବୀ ପରିସରରେ ଓଡ଼ିଶା ମିଳିତ ବିଦ୍ୟାଳୟ ପାଚିକା ସହାୟିକା ସଂଘ ତଥା ଅଲ ଇଣ୍ତିଆ ୟୁନାଇଟେଡ୍‌ ଟ୍ରେଡ୍‌ ୟୁନିୟନ୍‌ କ୍ୟାନଣ୍ଟର ତରଫରୁ ଏକ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ପାଚିକାମାନଙ୍କ ମୌଳିକ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା । ଦୀର୍ଘ ବର୍ଷ ଧରି ପାଚିକାମାନେ ବିଦ୍ୟାଳୟରେ ମାସିକ ୧୪ ଶହ ଟଙ୍କାରେ କାର୍ଯ୍ୟ କରି ଆସୁଛନ୍ତି । ଫଳରେ ଏତେ କମ୍ ଟଙ୍କାରେ ପରିବାର ପ୍ରତିପୋଷଣ କରିବା ଦୂରର କଥା ନିଜର ମାସିକ ଖର୍ଚ୍ଚ ବାବଦକୁ କମ ପଡିଥିବା ସଂଘ ପକ୍ଷରୁ କୁହାଯାଇଛି । ବଜାରରେ ସରକାର ସବୁ ଦରଦାମ ବୃଦ୍ଧି କରିଦେଲେ କିନ୍ତୁ ପାଚିକା ସହାୟିକାମାନଙ୍କ ଭବିଷ୍ୟତ ଓ ବେତନ କଥା ରାଜ୍ୟ ସରକାର ଚିନ୍ତା ଟିକିଏ କରୁନାହାନ୍ତି ବୋଲି ଅଭିଯୋଗ କରିଛି ସଂଘ । ଏହାକୁ ନେଇ ସରକାରଙ୍କ ନିକଟରେ ଦାବି ଉପସ୍ଥାପନ କରିବା ସହ ଦାବି ପୂରଣ ନହେଲେ କାର୍ଯ୍ୟବନ୍ଦ ସହ ଆନ୍ଦୋଳନର ଚେତାବନୀ ଦେଇଛି ସଂଘ ।

ଓଡିଶା ମିଳିତ ପାଚିକା ସହାୟିକା ସଂଘ ଆବାହକ ନିରଞ୍ଜନ ମହାନ୍ତି କହିଛନ୍ତି, ‘‘ସରକାର ଦରଦାମ ବୃଦ୍ଧି କରିଛନ୍ତି । ପ୍ରତ୍ୟେକ ଦିନ ହାଣ୍ଡିଶାଳକୁ ଚଡ଼କ ପଡୁଛି । ହେଲେ ପାଚିକାମାନଙ୍କ ଦରମାରେ ପରିବର୍ତ୍ତନ ହେଉ ନାହିଁ । ତେବେ ସେମାନଙ୍କୁ ସ୍ଥାୟୀ ନିଯୁକ୍ତି ହେବା ସହ ସାମାଜିକ ସୁରକ୍ଷା ପ୍ରଦାନ କରାଯାଉ । ମାସକୁ ୧୪ଶହ ଟଙ୍କା ପରିବର୍ତ୍ତେ 26 ହଜାର ଟଙ୍କା ଦରମା ବୃଦ୍ଧି କରିବା ପାଇଁ ଆମେ ସରକାରଙ୍କ ନିକଟରେ ଦାବି କରିଛୁ । ନିର୍ବାଚନ ପୂର୍ବରୁ ପାଚିକା ସହାୟିକାଙ୍କ ସଂଘର ଦାବି ରାଜ୍ୟ ସରକାର ଯଦି ନମାନନ୍ତି ତେବେ ଆନ୍ଦୋଳନକୁ ଓହ୍ଲାଇବା ପାଇଁ ବାଧ୍ୟ ହେବ ସଂଘ ।’’

ଇଟିଭି ଭାରତ, ନିଆଳି