କଟକ: ରାଜନୀତିରେ ଲମ୍ବା ଇନିଂସ ଖେଳିବା ପରେ ଏବେ କ୍ରିକେଟରେ ଇନିଂସ ଖେଳିବାକୁ ଯାଉଛନ୍ତି ଯାଜପୁରର ଟାଣୁଆ ନେତା ତଥା ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଆଗକୁ ଓଡିଶା କ୍ରିକେଟ ଆସୋସିଏସନର ନିର୍ବାଚନ ରହିଛି । ବବି ଦାସ ଓସିଏ ନିର୍ବାଚନ ଲଢିବା ଖବର ଚର୍ଚ୍ଚା ହେଉଥିବା ବେଳେ ଏହି ବାବଦରେ ଗ୍ରୀନ ସିଗନାଲ ଦେଇଛନ୍ତି ଓଡିଶା ଆସୋସିଏସନର ସଦସ୍ୟ ତଥା ଓସିଏ ପୂର୍ବତନ ସମ୍ପାଦକ ଆଶୀର୍ବାଦ ବେହେରା ।
ଅନୌପଚାରିକ ଭାବେ ଓସିଏ ନିର୍ବାଚନର ତିନୋଟି ପଦବୀ ପାଇଁ ନାଁ ଘୋଷଣା ହୋଇଛି । ପ୍ରଣବ ପ୍ରକାଶ ଦାସ ଓସିଏର ସଭାପତି ପଦ ପାଇଁ ପ୍ରାର୍ଥୀ ହେବେ । ପୁରୀରେ ଅନୁଷ୍ଠିତ ଓସିଏ ସଦସ୍ୟମାନଙ୍କୁ ନେଇ ବୈଠକରେ ପ୍ରଣବଙ୍କ ପ୍ରାର୍ଥୀତ୍ବ ଉପରେ ସର୍ବସମ୍ମତିକ୍ରମେ ମୋହର ବାଜିଛି । 73 ଭୋଟରଙ୍କ ମଧ୍ୟରୁ 55 ଜଣ ଭୋଟର ଏହି ବୈଠକରେ ଉପସ୍ଥିତ ଥିଲେ । କେବଳ ସଭାପତି ପଦ ନୁହେଁ ବରଂ ସମ୍ପାଦକ ଓ ଉପସଭାପତି ପଦ ପାଇଁ ମଧ୍ୟ ଅନୌପଚାରିକ ଭାବେ ପ୍ରାର୍ଥୀଙ୍କ ନାଁ ଘୋଷଣା ହୋଇଛି । ସମ୍ପାଦକ ପଦ ପାଇଁ ସଞ୍ଜୟ ବେହେରା ଓ ଉପସଭାପତି ଭାବେ ବର୍ତ୍ତମାନ ଓସିଏର ସଭାପତି ଥିବା ପଙ୍କଜ ମହାନ୍ତିଙ୍କ ନାଁ ମଧ୍ୟ ଚୂଡ଼ାନ୍ତ ହୋଇଛି । ଏବଂ ବାକିଥିବା କୋଷାଧ୍ୟକ୍ଷ ଓ ଜଣେ କାଉନସିଲ ମେମ୍ବରଙ୍କ ପ୍ରାର୍ଥୀ କିଏ ହେବେ ସେନେଇ ଖୁବ ଶୀଘ୍ର ନିଷ୍ପତ୍ତି ଗ୍ରହଣ କରାଯିବ ବୋଲି କହିଛନ୍ତି ଓସିଏର ପୂର୍ବତନ ସମ୍ପାଦକ ତଥା ସଦସ୍ୟ ଆଶୀର୍ବାଦ ବେହେରା ।
ସେହିପରି ସେ ଆହୁରି ମଧ୍ୟ କହିଛନ୍ତି, "ରାଜ୍ୟରେ ଅନ୍ୟକ୍ରୀଡ଼ା ମାନଙ୍କର ଯେଉଁ ଅନୁସାରେ ବିକାଶ ହେଉଛି ସେହି ଅନୁସାରେ ଲୋକପ୍ରିୟ କ୍ରୀଡା କ୍ରିକେଟର ବିକାଶ ହୋଇ ପାରୁନି । ତେଣୁ ରାଜ୍ୟ କ୍ରିକେଟକୁ ବହୁତ ଆଗକୁ ନେବାକୁ ହେଲା ସମସ୍ତଙ୍କର ସହଯୋଗର ଆବଶ୍ୟକ ରହିଛି । ରାଜ୍ୟ ସରକାର ଯଦି ଓସିଏର ବିକାଶ ଦିଗରେ ଚିନ୍ତା କରୁଛନ୍ତି ତେବେ ଓସିଏ ମଧ୍ୟ ଏଥିରେ ମନା କରିବାର କରିବାର ପ୍ରଶ୍ନ ଉଠୁନି । ଓସିଏ ପ୍ରତି ଯେଉଁମାନଙ୍କର ମନ ଉଣା ରହିଛି ସେମାନେ ଆସି ମିଳିତି ଭାବରେ ଓସିଏ ପାଇଁ କାମ କରନ୍ତୁ ।"
ଇଟିଭି ଭାରତ, କଟକ
