କଟକ: ସ୍ୟାଟ ଅଚଳ ହେବା ପରେ ଏଠାକୁ ବିଚାର ପାଇଁ ଆସୁଥିବା ମାମଲା ଗୁଡିକ ଦୀର୍ଘ ସମୟ ଧରି ବିଚାରଧୀନ ହୋଇ ପଡି ରହୁଥିଲା । ଯାହାଦ୍ବାରା ଆବେଦନକାରୀଙ୍କୁ ନାନା ସମସ୍ୟାର ସାମ୍ନା କରିବାକୁ ପଡୁଥିଲା । ମାତ୍ର ଗୁରୁବାର ହାଇକୋର୍ଟଙ୍କ ରାୟ ଆବେଦନକାରୀଙ୍କୁ ଆଶ୍ବସ୍ତି ଦେଇଛି ।
ସ୍ୟାଟ୍ରେ ବିଚାରଧୀନ କୌଣସି ମାମଲାକୁ ଯଦି ଜଣେ ଆବେଦନକାରୀ ହାଇକୋର୍ଟକୁ ଆଣନ୍ତି, ତେବେ ଉକ୍ତ ମାମଲାଟି ରେଜିଷ୍ଟ୍ରି ହେବା ସହ ଜଣିକିଆ ଖଣ୍ଡପୀଠରେ ଏହାର ଶୁଣାଣି ହେବ । ହାଇକୋର୍ଟ ରେଜିଷ୍ଟ୍ରାର ପକ୍ଷରୁ ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ରାଜ୍ୟର କଟକ ସ୍ୟାଟ ବେଞ୍ଚ, ଭୁବନେଶ୍ବର ବେଞ୍ଚ, ବ୍ରହ୍ମପୁର ବେଞ୍ଚ, ସମ୍ବଲପୁର ବେଞ୍ଚରୁ ହାଇକୋର୍ଟକୁ ଆସୁଥିବା ସମସ୍ତ ମାମଲା ଗୁଡିକୁ ଏହିଭଳି ଶୁଣାଣି କରିବାକୁ ସ୍ଥିର ହୋଇଛି ।
ଏଥିରେ ନୂଆ ମାମଲା, ଅଦାଲତ ଅବମାନନା ମାମଲା, ପୁନଃ ଆବେଦନ ମାମଲା ପ୍ରଭୃତି ରହିଛି । ସୂଚନାନୁସାରେ, ବର୍ତ୍ତମାନ ସ୍ୟାଟରେ ପ୍ରାୟ ୭୦ ହଜାର ମାମଲା ବିଚାର ପାଇଁ ପଡିରହିଛି । ସ୍ୟାଟ୍ ଉଚ୍ଛେଦ ନେଇ ରାଜ୍ୟ ସରକାରଙ୍କ ନିଷ୍ପତ୍ତି ପରେ ଏହାକୁ ବିରୋଧ କରି ହାଇକୋର୍ଟରେ ମାମଲା ରୁଜୁ ରହିଥିଲା । ଯାହା ଏବେ ବି ବିଚାରଧୀନ ରହିଛି । ଅପରପକ୍ଷେ ସ୍ୟାଟ ଉଚ୍ଛେଦ ଉପରେ କେନ୍ଦ୍ର ସରକାରଙ୍କ ମୋହର ବାଜି ସାରିଛି । ତେବେ ସ୍ୟାଟ୍କୁ ନେଇ ଏମିତି ସ୍ଥିତି ଏକପ୍ରକାର ଅଚଳାବସ୍ଥା ସୃଷ୍ଟି କରିଥିଲା ।
ଏଥିସହିତ ଆଇନରେ କୌଣସି ବ୍ୟବସ୍ଥା ନଥିବାରୁ ସ୍ୟାଟରେ ବିଚାରଧୀନ ମାମଲା ଗୁଡିକୁ ହାଇକୋର୍ଟକୁ ଆସିପାରୁନଥିଲା । ବିଶେଷ କରି ଚାକିରୀ ସଂକ୍ରାନ୍ତୀୟ ମାମଲାରେ ବସିଥିବା ଆବେଦକାରୀମାନେ ସ୍ୟାଟ୍ରୁ ହାଇକୋର୍ଟ ଆସୁଥିବାବେଳେ ସେମାନଙ୍କ ମାମଲା ବିଚାର ପାଇଁ ଗ୍ରହଣ ହୋଇପାରୁ ନଥିଲା । ଗୁରୁବାର ହାଇକୋର୍ଟଙ୍କ ଏହି ନିର୍ଦ୍ଦେଶ ପରେ ସ୍ୟାଟ୍ର ମାମଲା ହାଇକୋର୍ଟରେ ରୁଜୁ କରୁଥିବା ଆବେଦନକାରୀଙ୍କୁ ଆଶ୍ବସ୍ତି ଦେଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
