କଟକ: ‘ମୁଁ ଇଞ୍ଜିନିୟର । ମୋ ବାପା ଆରଟିଓ ଅଫିସରେ ବଡ ଅଧିକାରୀ । ଆମ ପରିବାରର ହାଇ ଷ୍ଟାଟସ । ଚାଲ ଆମେ ବାହାହେଇ ଯିବା । ତୁମକୁ ମୁଁ ଖୁବ ଭଲରେ ରଖିବି’ । ଏପରି ଅନେକ ପ୍ରତିଶ୍ରୁତି ଦେଇ ଯୁବତୀଙ୍କୁ ଫସାଇଥିଲା ପ୍ରେମିକ । ପ୍ରେମ ନିବିଡ ହେବାପରେ ସେକ୍ସ ଓ ପରେ ଧୋକା ଦେଇ ଅନ୍ତରଙ୍ଗ ମୁହୂର୍ତ୍ତର ଫଟୋକୁ ସୋସିଆଲ ମିଡିଆରେ ଭାଇରାଲ କରିଥିଲା । ଏପରି ଘଟଣା ଦେଖିବାକୁ ମିଳିଛି ମାହାଙ୍ଗା ଅଞ୍ଚଳରେ। ମାହାଙ୍ଗା ଥାନାରେ ଅଭିଯୋଗ ହେବା ପରେ ପୋଲିସ ଅଭିଯୁକ୍ତକୁ ଗିରଫ କରି ତଦନ୍ତ ଜାରି ରଖିଛି। ତେବେ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ପୀଡିତା ଦାବି କରିଛନ୍ତି । ଅନ୍ୟପଟେ ଅଭିଯୁକ୍ତ ଏହାକୁ ଖଣ୍ଡନ କରିବା ସହ ଘଟଣାର ସମାଧାନ କରିବାକୁ ଅନୁରୋଧ କରିଛି।
ସୂଚନା ଅନୁଯାୟୀ, ମାହାଙ୍ଗା ଥାନା ପଲ୍ଲୀସାହି ଗ୍ରାମର ଲଳିତ ମୋହନ ପଟ୍ଟନାୟକ ନାମକ ଜଣେ ଯୁବକ ମାହାଙ୍ଗା ଅଞ୍ଚଳର ଏକ ଡିଗ୍ରୀ କଲେଜର ଛାତ୍ରୀଙ୍କୁ ପ୍ରଥମେ ପ୍ରେମ ଜାଲରେ ଫସାଇଥିଲା। ନିଜ ଜନ୍ମଦିନରେ ଓଳାଶୁଣୀ ଗୁମ୍ଫା ବୁଲାଇ ନେବା କହି ସେଠାରେ ଯୁବତୀଙ୍କୁ ଧମକାଇବା ସହ ଜବରଦସ୍ତ ସେକ୍ସ କରିଥିବା ମାହାଙ୍ଗା ଥାନାରେ ଛାତ୍ରୀ ଜଣକ ଅଭିଯୋଗ କରିଛନ୍ତି l ଏହି ଘଟଣାପରେ ଛାତ୍ରୀ ଜଣଙ୍କର ଅଶ୍ଲୀଳ ଫଟୋ ରଖି ଅନେକ ସମୟରେ ବ୍ଲାକମେଲ କରିଆସୁଥିଲା । ଶେଷରେ ଯୁବକ ଜଣକ ଅନ୍ତରଙ୍ଗ ମୁହୂର୍ତ୍ତର ଫଟୋକୁ ସୋସିଆଲ ମିଡିଆରେ ଭାଇରାଲ କରିଥିଲା ବୋଲି ଯୁବତୀ ଅଭିଯୋଗ କରିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
