କଟକ: କଟକ ବମ୍ପକୁଦରେ କମିଶନରେଟ ପୋଲିସ ଏକ ନକଲି ତେଲ ତିଆରି କାରାଖାନାରେ ଚଢାଉ କରିଛି । ଘଟଣାସ୍ଥଳରୁ 30 ହଜାରରୁ ଅଧିକ ଲିଟର ନକଲି ତେଲକୁ ପୋଲିସ ଜବତ କରିବା ସହ କାରଖାନାକୁ ସିଲ କରିଛି। ଘଟଣାରେ ସଂପୃକ୍ତ 2 ଜଣକୁ ଅଟକ ରଖି ଅଧିକ ତଦନ୍ତ ଚଳାଇଛି ପୋଲିସ।
ବମ୍ପକୁଦ ଅଞ୍ଚଳରେ ନକଲି ତେଲ ପ୍ରସ୍ତୁତ ହେଉଥିବା ଖବର ପାଇ ସଦର ଥାନା ପୋଲିସ ଚଢ଼ାଉ କରିଥିଲା। କାରଖାନାରୁ 30 ହଜାର ଲିଟରରୁ ଉର୍ଦ୍ଧ୍ବ ନକଲି ତେଲ ଜବତ କରିଛି। ଏଥିସହ ବ୍ୟବହୃତ ହେଉଥିବା ଟ୍ରକ, ତେଲ ପ୍ରସ୍ତୁତ ସାମଗ୍ରୀକୁ ମଧ୍ୟ ଜବତ କରିଛି ପୋଲିସ। ସେହିପରି କାରଖାନାଟିକୁ ମଧ୍ୟ ସିଲ କରାଯାଇଛି। ଏହି କାରଖାନାର ମାଲିକ ଓ ମ୍ୟାନେଜରଙ୍କୁ ଥାନାରେ ଅଟକ ରଖି ତଦନ୍ତ ଜାରି ରଖିଛି। ବିଶେଷକରି କିଭଳି ଏହା ପ୍ରସ୍ତୁତ କରାଯାଉଥିଲା? କେଉଁଠୁ କଞ୍ଚାମାଲ ଆସୁଥିଲା? ଏଥିରେ ଆଉ କେଉଁମାନେ ସମ୍ପୃକ୍ତ ଅଛନ୍ତି? ଆଦି ସମସ୍ତ ଦିଗରେ ତଦନ୍ତ ଚଳାଇଛି କମିଶନରେଟ ପୋଲିସ। ତେବେ ଖୁବ ଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି କଟକ ଡିସିପି କହିଛନ୍ତି।
ସୂଚନାଯୋଗ୍ୟ, ବମ୍ପିକୁଦ ଅଞ୍ଚଳରେ ପ୍ରାୟ 15ଗୁଣ୍ଠ ଜମିରେ ଦୀର୍ଘ ବର୍ଷ ଧରି ନକଲି ତେଲ କାରଖାନା ଚାଲିଥିଲା । କଲିକତାର ହଳଦିଆରୁ ଆସୁଥିଲା କଞ୍ଚାମାଲ। ସେଥିରେ ଅପମିଶ୍ରଣ କରି ପ୍ରସ୍ତୁତ କରାଯାଉଥିଲା ଖାଇବା ତେଲ। ଗୋଟିଏ ପ୍ରକାର ତେଲରୁ ପ୍ରସ୍ତୁତ ହେଇଥିଲା ବିଭିନ୍ନ ପ୍ରକାର ବ୍ରାଣ୍ଡର ତେଲ। କେହି ଯେପରି ଜାଣି ନ ପାରିବେ, ସେଥିରେ ନାମୀ ଦାମୀ କମ୍ପାନୀର ଷ୍ଟିକରିଂ କରି ବଜାରକୁ ଛଡା ଯାଉଥିଲା। ଏପରିକି ଉପକୂଳବର୍ତ୍ତୀ ଅଞ୍ଚଳର ବିଭିନ୍ନ ସ୍ଥାନକୁ ଏହି ନକଲି ତେଲକୁ ପଠାଯାଉଥିଲା। ବିଶେଷକରି ଅନୁଗୁଳ, ଢେଙ୍କାନାଳ, ଭଦ୍ରକ, କେନ୍ଦ୍ରାପଡା, ଯାଜପୁର, କଟକ ଆଦି ଅଞ୍ଚଳର ଦୋକାନ ମାନଙ୍କରେ ଏହାକୁ ବିକ୍ରି କରାଯାଉଥିଲା।
ପୂର୍ବରୁ ନକଲି ସାବୁନ, ନକଲି ସିମେଣ୍ଟ, ନକଲି ମସଲା ପ୍ରସ୍ତୁତ କରୁଥିବା କାରଖାନାକୁ ପୋଲିସ ଠାବ କରିଛି। ହେଲେ କଟକରେ ପୁଣି ବଡ ଧରଣର ନକଲି ତେଲ କାରଖାନା ଠାବ ଯାହାକୁ ନେଇ ଖାଉଟି ଚିନ୍ତାରେ ପଡିଛି ।
କଟକରୁ ନାରାୟଣ ସାହୁ ,ଇଟିଭି ଭାରତ
