କଟକ: ସାରା ଦେଶରେ ସେପ୍ଟେମ୍ବର ପହିଲାରୁ ନୂଆ ଟ୍ରାଫିକ ନିୟମ ଲାଗୁ ହେବା ପରେ ଗାଡି ଚାଳକଙ୍କ ଅବସ୍ଥା ବେହାଲ । ଟ୍ରାଫିକ୍ ନିୟମ ଉଲ୍ଲଙ୍ଘନକାରୀଙ୍କୁ ଧରପଗଡ ଏବଂ ମୋଟା ଅଙ୍କର ଜୋରିମାନା ଆଦାୟ ସମସ୍ତଙ୍କ ହୋସ୍ ଉଡାଇଛି । ଏହି କ୍ରମରେ ଗତକାଲି ଜଣେ ମଦୁଆ ଡ୍ରାଇଭରକୁ ଗିରଫ କରାଯାଇଛି । ଗିରଫ ଡ୍ରାଇଭର ହେଲେ କନ୍ଦରପୁର ଥାନା ମତଗଜପୁର ଅଞ୍ଚଳର ରାକେଶ ପଣ୍ଡା ।
ସୂଚନାନୁସାରେ, ଗତକାଲି କଟକ ନୂଆବଜାର ଅଞ୍ଚଳରେ ପାଟ୍ରୋଲିଂ କରୁଥିଲା ପୋଲିସ । ଏହି ସମୟରେ ରାକେଶ ଦ୍ରୁତଗତିରେ ଗାଡି ଚଳାଇ ଆସୁଥିଲା । ପୋଲିସ ତାଙ୍କୁ ଅଟକାଇ ଯାଞ୍ଚ କରିଥିଲା । ପ୍ରଚୁର ମଦ ପିଇଥିବାରୁ ସେ ଠିକ୍ ଭାବରେ ଗାଡି ଚଳାଇପାରୁନଥିଲା । ନୂଆ ନିୟମ ଅନୁସାରେ ମଦ ପିଇ ଗାଡି ଚଳାଇବା ଅଭିଯୋଗରେ ରାକେଶକୁ ଗିରଫ କରିଛି ପୋଲିସ ।
କଟକରୁ ନାରାୟଣ ସାହୁ, ଇଟିଭି ଭାରତ
