କଟକ: ଭଗବାନଙ୍କ ଆଶୀର୍ବାଦ ବିନା ଏହି ସୃଷ୍ଟିର ଗତି ନାହିଁ । ଏପରିକି ଅସମ୍ଭବକୁ ସମ୍ଭବ କରି ଦେଖାଇବା ତାହା ମଧ୍ୟ ତାଙ୍କରି ହାତରେ । ଏହା କହିବାର ଅର୍ଥ ଜଣେ ଅଟିଜିମ୍ ସ୍ପେକ୍ଟ୍ରମ୍ ଡ଼ିଜଅର୍ଡର ପିଲା ଯିଏ ନିଜର ଅକ୍ଷମତାକୁ ପଛରେ ପକାଇ ଏକ ସଫଳ ଭବିଷ୍ୟତ ପାଇଁ ଭିଡିଛନ୍ତି ଅଣ୍ଟା । ନିଜର ଅଦମ୍ୟ ପ୍ରୟାସରେ ଇଣ୍ଡିଆ ବୁକ୍ ଅଫ୍ ରେକର୍ଡରେ ନିଜ ନାଁକୁ ଯୋଡିଛି । ଏହାସହ ପାଲଟିଛି ସମାଜ ପାଇଁ ଏକ ଉଦାହାରଣ । ସେ ହେଉଛନ୍ତି କଟକ ଚାଉଳିଆଗଞ୍ଜର ଆଶୁତୋଷ ପାଣିଗ୍ରାହୀ । ସେ ଆବାକସ ପକ୍ଷରୁ ଅନୁଷ୍ଠିତ ହୋଇଥିବା ଗଣିତ ପ୍ରତିଯୋଗୀତାରେ ଭାଗନେଇ ଇଣ୍ଡିଆ ବୁକ୍ ଅପ୍ ରେକର୍ଡରେ ନିଜ ସ୍ଥାନ ଅଧିକାର କରିପାରିଛନ୍ତି ।
କଟକ ଚାଉଳିଆଗଞ୍ଜରେ ରହୁଥିବା ବିଶ୍ଵଜିତ ପାଣିଗ୍ରାହୀ ଓ ନିବେଦିତା କରଙ୍କ ପୁଅ ଆଶୁତୋଷ ପାଣିଗ୍ରାହୀ ।ସେ ପିଲାଟି ଦିନରୁ ହିଁ ଅଟିଜିମ୍ ସ୍ପେକ୍ଟ୍ରମ୍ ଡ଼ିଜଅର୍ଡର ପୀଡିତ ହୋଇଛନ୍ତି । କିନ୍ତ ତାଙ୍କର ଇଚ୍ଛା ଶକ୍ତି ଆଗରେ ସବୁକିଛି ଫିକା ପଡ଼ିଛି ।କୁହାଯାଏ ଭଗବାନଙ୍କ ଅପାର କରୁଣା ଥିଲେ ପଙ୍ଗୁ ବି ଗିରୀ ଲଙ୍ଘିଥାଏ । ଅସମ୍ଭବକୁ ସମ୍ଭବ କରେଇବାର ଲକ୍ଷ୍ୟ ନେଇ ଏବେ ଇଣ୍ଡିଆ ବୁକ୍ ଅଫ୍ ରେକର୍ଡର ଅଧିକାରୀ ହୋଇଛନ୍ତି ସେ ।
ଗତ କିଛି ମାସ ତଳେ ଜାମସେଦପୁରରେ ଭାରତୀୟ ଆବାକସ ପକ୍ଷରୁ ଅନୁଷ୍ଠିତ ହୋଇଥିବା ଗଣିତ ପ୍ରତିଯୋଗୀତାରେ ମାତ୍ର 15 ମିନିଟରେ 200 ରୁ ଉର୍ଦ୍ଧ୍ବ ଜଟିଳ ମିଶାଣ, ଫେଡାଣ ଓ ଗୁଣନ କରି ଏହି ରେକର୍ଡର ହାସଲ କରିପାରିଛନ୍ତି ଆଶୁତୋଷ । ଆବାକସ, କୋଡ଼ିଂ, ଭାର ଉତ୍ତୋଲନ, କମ୍ପୁଟରରେ ବିଭିନ୍ନ କାର୍ଯ୍ୟରେ ବେଶ ପାରଙ୍ଗମ । ଏହାସହ ନିଜର ସଙ୍ଗୀତ ରୁଚି ମଧ୍ୟ ବେଶ ଅନନ୍ୟ । ତାଙ୍କର ଭଜନ ଗାଇବା ଶୈଳୀ ମଧ୍ୟ ଚକିତ କଲା ପରି । ତେବେ ଆଗମୀ ଦିନରେ ସେ ଜଣେ ଦକ୍ଷ ସଙ୍ଗୀତଜ୍ଞ, କୋଡ଼ିଂ, ସହ ଅବାକସ ଟ୍ରେନର ହେବାର ଲକ୍ଷ୍ୟ ରଖିଛନ୍ତି ।
