କଟକ: ଆସୁଛି ପାର୍ବଣ ଋତୁ । ଆଉ କିଛି ଦିନ ପରେ ଧରାପୃଷ୍ଠକୁ ଓହ୍ଲାଇବେ ଜଗତ ଜନନୀ ମା ଦୁର୍ଗା । ପାର୍ବଣକୁ ନେଇ ଉଠିବ ପଡିବ ଐତିହ୍ୟ ନଗରୀ ଭାଇଚାରାର ସହର କଟକ । ଦୁର୍ଗାପୂଜାରେ କଟକରେ ଲାଗି ରହେ ଅସମ୍ଭବ ଭିଡ । ମାଙ୍କ ପୂଜାକୁ ଶାନ୍ତି ଶୃଙ୍ଖଳାର ସହ ଶେଷ କରିବା ପାଇଁ ପୋଲିସ ପ୍ରଶାସନ ବ୍ୟାପକ ପ୍ରସ୍ତୁତି କରନ୍ତି । ଏଥିପାଇଁ ପୂଜା ପୂର୍ବରୁ ସମସ୍ତ ସଂପ୍ରଦାୟ, ବିଭିନ୍ନ ରାଜନୈତିକ ଦଳ ବୁଦ୍ଧିଜୀବୀ, ସମାଜସେବୀଙ୍କୁ ନେଇ ପୋଲିସ କରେ ପ୍ରସ୍ତୁତି ବୈଠକ । ଚଳିତ ବର୍ଷ ମଧ୍ୟ ପ୍ରଥମ ପ୍ରସ୍ତୁତି ବୈଠକ ଶେଷ ହୋଇଛି ।
କିନ୍ତୁ ବିଡମ୍ବନା ଏହି ପ୍ରସ୍ତୁତି ବୈଠକରେ ରାଜ୍ୟର ଏକମାତ୍ର ସଂଖ୍ୟାଲଘୁ ବିଧାୟକ ତଥା କଟକ ବାରବାଟୀ ବିଧାୟକ ମହମ୍ମଦ ମୁକିମଙ୍କୁ ଏହି ବୈଠକକୁ ଡକାଯାଇନଥିଲା । ଯାହାକୁ ନେଇ କଂଗ୍ରେସରେ ଦେଖାଦେଇଛି ଅସନ୍ତୋଷ । ଆଜି ଏହି ପ୍ରସଙ୍ଗରେ ଯୁବ କଂଗ୍ରେସ ଓ ମହିଳା କଂଗ୍ରେସ କଟକ ଡିସିପିଙ୍କ ବିରୋଧରେ ବିଷୋଦଗାର କରିଛନ୍ତି । ଏହାସହ ଅଭିଯୋଗ କରିଛନ୍ତି ଡିସିପି କଟକ ସହରର ଭାଇଚାରା ଭଙ୍ଗ କରୁଛନ୍ତି । ଏହି ଅଭିଯୋଗ ଆଣି ଡିସିପି ଅଖିଳେଶ୍ବର ସିଂଙ୍କ କୁଶପୁତ୍ତଳିକା ଦାହ କରିବା ସହ ତାଙ୍କ ଇସ୍ତାଫା ଦାବି କରିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
