କଟକ: ଦୀର୍ଘଦିନ ପରେ ମଙ୍ଗଳାବାଗ ଅଞ୍ଚଳ ଲୁଟ ଘଟଣାରେ କମିଶନରେଟ ପୋଲିସ ମିଳିଛି ବଡ ସଫଳତା । ଲୁଟ ଘଟଣାର ଲୁଟେରା ଗ୍ୟାଙ୍ଗକୁ ଗିରଫ କରିଛି କମିଶନରେଟ ପୋଲିସ । ପୋଲିସ ହ୍ୟାଣ୍ଡକପରୁ ଖସିଥିବା ଏହି ଗ୍ୟାଙ୍ଗ ଆଜି ପୋଲିସ ପଞ୍ଝାରେ ଧରା ପଡିଛି । ମଙ୍ଗଳାବାଗ ଅଞ୍ଚଳ ଗାର୍ମେଣ୍ଟ ଦୋକାନ ଓ ଏସବିଆଇ ବ୍ୟାଙ୍କ ଚୋରି ଘଟଣାରେ 4 ଜଣ ଅଭିଯୁକ୍ତ ଙ୍କୁ ଗିରଫ କରି କୋର୍ଟ ଚାଲାଣ କରିଛି କମିଶନରେଟ ପୋଲିସ ।
ତେବେ ଵର୍ତ୍ତମାନ ସୁଦ୍ଧା ଆଉ ଜଣେ ଅଭିଯୁକ୍ତ ଫେରାର ରହିଥିବାବେଳେ ଆଗାମୀ ଦିନରେ ସମସ୍ତ ଗ୍ୟାଙ୍ଗକୁ ଗିରଫ କରିବାରେ ସଫଳ ହେବା ନେଇ ସୂଚନା ଦେଇଛି କମିଶନରେଟ ପୋଲିସ ।
ସୂଚନା ଅନୁସାରେ, ଫନି ପରେ କଟକ ସମ୍ପୂର୍ଣ ଅନ୍ଧକାର ହୋଇଯାଇଥିଲା । ଆଉ ସେହି ସମୟର ଫାଇଦା ନେଇ କିଛି ଲୁଟେରା ଗ୍ୟାଙ୍ଗ ପ୍ରଥମେ ଅମ୍ବର ଗାର୍ମେଣ୍ଟ ଦୋକାନରୁ 4 ଲକ୍ଷ ଟଙ୍କାର ସାମଗ୍ରୀ ଚୋରି କରିବା ପରେ, ପାଖ ଏସବିଆଇ ବ୍ୟାଙ୍କ ଉପରେ ନଜର ପକାଇଥିଲେ ।
ତେବେ ବ୍ୟାଙ୍କରେ ଚୋରି କରିବା ସମୟରେ ସତର୍କ ଘଣ୍ଟି ବାଜିବାରୁ ସେଠାରୁ ପଳାୟନ କରିଥିଲେ ସମସ୍ତେ । ତେବେ ଘଟଣାକୁ 3 ମାସରୁ ଉର୍ଦ୍ଧ୍ବ ସମୟ ବିତିଥିଲେ ସୁଦ୍ଧା ଏଯାବତ ପୋଲିସ ର ହାତ ଖାଲି ଥିଲା । କିନ୍ତୁ ଆଜି ସେହି ଗ୍ୟାଙ୍ଗକୁ ଗିରଫ କରିଛି କମିଶନରେଟ ପୋଲିସ । ତେବେ ଏହି ଗ୍ୟାଙ୍ଗ ର ମୁଖିଆ ମାଲଗୋଦାମ ଅଞ୍ଚଳର ପିଣ୍ଟୁ କୁ ଗିରଫ କରିବା ପରେ ଅନ୍ୟ ସାଥିମାନଙ୍କୁ ସହଜରେ ଗିରଫ କରିଛି ପୋଲିସ । ତେବେ ସେମାନଙ୍କୁ ଗିରଫ ପରେ କୋର୍ଟ ଚାଲାଣ କରିଛି କମିଶନରେଟ ପୋଲିସ ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
