କଟକ: ଜିଲ୍ଲାର ନରସିଂହପୁର ମହାବିଦ୍ୟାଳୟର ଛାତ୍ର ଓ ଅଣଛାତ୍ର ମଧ୍ୟରେ ହୋଇଥିବା ଗୋଷ୍ଠୀ ସଂଘର୍ଷ ଉଗ୍ରରୂପ ଧାରଣ କରିଛି। କମେଣ୍ଟ ମରାକୁ କେନ୍ଦ୍ରକରି ଉଭୟ ଗୋଷ୍ଠୀ ମଧ୍ୟରେ ପ୍ରଥମେ ପାଟିତୁଣ୍ଡ ହୋଇଥିଲା । ପରେ ଅଲରା ଗ୍ରାମର କିଛି ଅଣଛାତ୍ର ମହାବିଦ୍ୟାଳୟ ବାହାରେ ଛାତ୍ରଙ୍କ ଗାଡି ଭଙ୍ଗାରୁଜା କରିବା ସହିତ ସେମାନଙ୍କୁ ମାଡ ମାରିଥିଲେ। ତେବେ ଘଟଣାସ୍ଥଳରେ ପୋଲିସ ପହଞ୍ଚି ସେମାନଙ୍କୁ ଉଠାଇ ନେବାରୁ ସେମାନେ ପୋଲିସ ଗାଡି ଭଙ୍ଗାରୁଜା କରିବା ସହିତ ପୋଲିସ ଉପରକୁ ଢେଲାମାଡ କରିଥିଲେ।
ପରବର୍ତ୍ତୀ ସମୟରେ ଏହି ଅଣଛାତ୍ର ନରସିଂହପୁର ପେଟ୍ରୋଲ ପମ୍ପ ନିକଟରେ ୬୫ ନମ୍ବର ରାଜ୍ୟ ରାଜପଥ ଅବରୋଧ କରିଥିଲେ । ଫଳରେ ପୋଲିସ ଘଟଣାସ୍ଥଳରେ ପହଞ୍ଚି ସେମାନଙ୍କୁ ବୁଝାସୁଝା କରିଥିଲା । ହେଲେ ଛାତ୍ର ପୋଲିସ ଉପରକୁ ଢେଲାମାଡ କରିଥିଲେ। ଫଳରେ ପୋଲିସକୁ ମୃଦୁ ଲାଠିଚାଳନା କରିବାକୁ ପଡିଥିଲା।
ସେପଟେ ମହାବିଦ୍ୟାଳୟ ପରିସରରେ ଉତ୍ତେଜନାକୁ ଦୃଷ୍ଟିରେ ରଖି ସେଠାରେ ୨ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ମହାବିଦ୍ୟାଳୟରେ ବାରମ୍ବାର ଏଭଳି ଘଟଣା ଘଟୁଥିଲେ ସୁଦ୍ଧା ସମ୍ପୃକ୍ତ ଛାତ୍ରଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ । ଫଳରେ ମହାବିଦ୍ୟାଳୟ ଦିନକୁ ଦିନ ଅପରାଧିଙ୍କ ଆଡ୍ଡାସ୍ଥଳ ପାଲଟିଥିବା ଅଭିଯୋଗ ହୋଇଛି।
କଟକରୁ ନାରାୟଣ ସାହୁ, ଇଟିଭି ଭାରତ
