କଟକ: 23 ତମ ପ୍ରତିଷ୍ଠା ଦିବସରେ ଆଭିମୁଖ୍ୟ ସ୍ପଷ୍ଟ କଲା ବିଜେଡି । ଆସନ୍ତା ପୌର ନିର୍ବାଚନରେ ଜିତିବ ବିଜୁ ଜନତା ଦଳ । କୌଣସି କାରଣରୁ କଟକ ବାରବାଟୀ ଦଳ ହାତରୁ ଚାଲିଯାଇଛି । କିନ୍ତୁ ଆମେ ହାର ମାନିନୁ । ବରଂ ଆହୁରି ସଶକ୍ତ ହୋଇଛୁ । ଆସନ୍ତା 8 କିମ୍ବା 9 ମାସ ମଧ୍ୟରେ ହେବାକୁ ଥିବା ପୌର ନିର୍ବାଚନରେ ମହାନଗର ନିଗମକୁ ନିଜ ହାତକୁ ନେବ ବିଜେଡି । ମେୟର ପଦରେ ଜିତିବ ବିଜେଡି ବୋଲି ସ୍ପଷ୍ଟ କରିଛନ୍ତି ବିଜେଡି ସଭାପତି ଦେବାଶିଷ ସାମନ୍ତରାୟ ।
ଏହା ସହିତ ବିଜେଡି କେନ୍ଦ୍ରକୁ ସର୍ବଦା ସମର୍ଥନ କରି ଆସିଛି । କଂଗ୍ରେସ ସରକାର ସମୟରେ କଂଗ୍ରେସକୁ ଓ ବିଜେପି ସରକାରରେ ବିଜେପିକୁ ସମର୍ଥନ କରିଆସିଛି ବିଜେଡି । କିନ୍ତୁ ରାଜ୍ୟରେ ବିଜେଡି ଏକା କି ଲଢିବା ଶିଖିଛି ଓ ଲଢୁଥିବ ମଧ୍ୟ । ଏହାସହିତ ଅର୍ଥନୈତିକ ଉନ୍ନତି କିପରି ହୋଇପାରିବ ଓ ରାଜସ୍ୱର ପରିଧି ବୃଦ୍ଧି ପାଇବ ସେଥିପାଇଁ ଆମ ସରକାର ସର୍ବଦା ଚେଷ୍ଟିତ ବୋଲି କହିଛନ୍ତି କଟକ ସାଂସଦ ଭର୍ତ୍ତୃହରି ମହତାବ ।
ଆଜି (ଗୁରୁବାର) ଚାଉଳିଆଗଞ୍ଜ ଗ୍ରାଉଣ୍ଡରେ ଅନୁଷ୍ଠିତ ବିଜେଡିର 23ତମ ପ୍ରତିଷ୍ଠା ଦିବସ ଉପଲକ୍ଷେ ପୂର୍ବତନ ଚୌଦ୍ବାର ବିଧାୟକ ପ୍ରଭାତ ବିଶ୍ୱାଳ, ବିଧାୟକ ସୌଭିକ ବିଶ୍ୱାଳ, ସାଂସଦ ଭର୍ତ୍ତୃହରି ମହତାବ, ଜିଲା ସଭାପତି ଦେବାଶିଷ ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ ।
କଟକରୁ ପ୍ରଭୂ କଲ୍ୟାଣ ପାଲ୍, ଇଟିଭି ଭାରତ
