ଭୁବନେଶ୍ବର: ‘ଫନି’ ବାତ୍ୟାର କରୁଣ ପରିସ୍ଥିତିକୁ କିଭଳି ସାମ୍ନା କରାଗଲା । ତାହାର ସମସ୍ତ ଦୃଶ୍ୟକୁ ବାନ୍ଧି ଓଡିଶା ପୋଲିସ ପକ୍ଷରୁ ଏକ ଡକ୍ୟୁମେଣ୍ଟାରୀ ଫିଲ୍ମ ପ୍ରଦର୍ଶିତ କରାଯାଇଛି । ମଙ୍ଗଳବାର ରାଜ୍ୟ ସଚିବାଳୟରେ ଏହି ଫିଲ୍ମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉନ୍ମୋଚନ କରିଛନ୍ତି । ଏହି ଐତିହାସିକ ମୁହୁର୍ତ୍ତରେ ଡିଜିପି ସହ ଅନ୍ୟ ବରିଷ୍ଠ ପୋଲିସ ଅଧିକାରୀ ସବୁ ଯୋଗ ଦେଇଥିଲେ ।
ଦୁଇଟି ଭାଗ ଫିଲ୍ମଟି ପ୍ରସ୍ତୁତ ହୋଇଛି । ଗୋଟିଏ ୩ ତିନି ମିନିଟ୍ ରହିଥିବା ବେଳେ ଅନ୍ୟ ଟି ୧୫ ମିନିଟ ଅବଧିର ରହିଛି । ଏହି ଫିଲ୍ମ କୁ ପୋଲିସ ବିଭାଗର ସମସ୍ତ ଅଫିସିଆଲ ସୋସିଆଲ ମିଡ଼ିଆ ରେ ଅପଲୋଡ଼ କରାଯିବ । ୟୁ-ଟ୍ୟୁବ୍ ,ଟ୍ବିଟର ,ଫେସବୁକ ରେ ମଧ୍ୟ ଏହା ଉପଲବ୍ଧ ହେବ । ଏହା ସହ ବିଭିନ୍ନ ସେଣ୍ଟ୍ରାଲ ଏଜେନ୍ସି କୁ ମଧ୍ୟ ପଠାଯିବ । ଓଡିଶା ପୋଲିସର କାର୍ଯ୍ୟ ଦକ୍ଷତା, କର୍ମକୁଶଳତା, ବିତ୍ପତ୍ତି ସମୟର ତତ୍ପରତା ଏବଂ ଫାଷ୍ଟ ରେସପଣ୍ଡକୁ ଏଥିରେ ଦର୍ଶାଯାଇଛି ।
ଏହି ଡକ୍ୟୁମେଣ୍ଟାରୀ ଫିଲ୍ମରୁ ପ୍ରଭାବିତ ହୋଇ ଅନ୍ୟ ରାଜ୍ୟ ପୋଲିସ ମଧ୍ୟ ପ୍ରାକୃତିକ ଦୁର୍ବିପାକ ସମୟରେ ଏହି ଶୈଳୀକୁ ଆପଣାଇ ପାରିବେ ବୋଲି ଡିଜିପି ଆର.ପି ଶର୍ମା କହିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
