ଭୁବନେଶ୍ବର: ଖୋର୍ଦ୍ଧା ପରେ ଏବେ ଟାଙ୍ଗୀ ଖଣି ଖାଦାନରେ ଏସଟିଏଫ ଟିମ । ବେଆଇନ ଖଣି ଖନନ ନେଇ ଟାଙ୍ଗୀ ତହସିଲ ଅନ୍ତର୍ଭୁକ୍ତ ବଳରାମପୁର ପଥର ଖାଦାନରେ ଅଚାନକ ଚଢାଉ କରିଛନ୍ତି ଏସଟିଏଫ ଇନସ୍ପେକଟର ଆଲୋକ ଜେନାଙ୍କ ଟିମ । ଚଢାଉ ବେଳେ ତିନି ଜଣ ଖଣି ମାଫିଆଙ୍କୁ ଗିରଫ କରିଛି ଟିମ ।
ଗିରଫ ଖଣି ମାଫିଆମାନେ ହେଲେ ନୟାଗଡର ଶ୍ୟାମାବନ୍ଧୁ ଡାକୁଆ, ମାନସ ରଞ୍ଜନ ପ୍ରଧାନ, ଖୋର୍ଦ୍ଧା ଜଙ୍କିଆର ମୁକୁନ୍ଦ ଖଣ୍ଡାୟତ ରାୟ । ଖାଲି ସେତିକି ନୁହେଁ ସେଠାରୁ ବେଆଇନ ଖଣି ଖାଦାନରେ ବ୍ୟବହାର ହେଉଥିବା କ୍ରସର ଫିଟେଡ ଟ୍ରାକ୍ଟର ,ପଥର ବୋଝେଇ ଟ୍ରକ, ଅଟୋକଟ ଷ୍ଟାବିଲାଇଜର, ଇଲେକ୍ଟ୍ରିକ ୱେୟାର, ହାମର , ଜ୍ଯାକ, ଡ୍ରିଲର, ଡିଜେଲ କମ୍ପ୍ରେସର ଆଦି ଜବତ କରାଯାଇଛି ।
ତେବେ ଗିରଫ ଅଭିଯୁକ୍ତମାନଙ୍କୁ ଆଜି ଟାଙ୍ଗୀ ଜେଏମଏଫସି କୋର୍ଟରେ ହାଜର କରାଯାଇଛି । ଆଇପିସିର ଧାରା ୩୭୯, ୪୪୭, ୩୪, ଆର୍ମସ ଆକ୍ଟ ୨୫,୨୭, ଇଣ୍ଡିଆନ ଏତ୍ସପ୍ଲୋସିଭ ଆକ୍ଟ ୩,୪,୫ରେ କୋର୍ଟ ଚାଲାଣ କରାଯାଇଛି । ପୂର୍ବରୁ ଖୋର୍ଦ୍ଧା ତହସିଲ ଅଞ୍ଚଳରେ ତାପଙ୍ଗ ଖଣିରେ ଚଢାଉ ବେଳେ ଜଣେ ଖଣି ମାଫିଆକୁ ଗିରଫ କରିଥିଲା ଟିମ । ଆଗକୁ ମଧ୍ୟ ଖଣି ମାଫିଆଙ୍କ ଗିରଫଦାରି ବଢିପାରେ ବୋଲି ସୁଚନା ମିଳିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
