ବୌଦ୍ଧ: ନିମ୍ନମାନର ରାସ୍ତା କାମ ଯୋଗୁଁ ନିର୍ମାଣ(poor road construction) ହେଉ ହେଉ ଉଠିଯାଉଛି ପିଚୁ । ଏହାର ପ୍ରତିବାଦରେ ଅଞ୍ଚଳବାସୀ ରାସ୍ତା ନିର୍ମାଣ କାର୍ଯ୍ୟକୁ କରିଦେଇଛନ୍ତି ବନ୍ଦ । ତେବେ ବୌଦ୍ଧ ଜିଲ୍ଲା ପୁରୁଣାକଟକଠାରୁ ଧଳପୁର ପର୍ଯ୍ୟନ୍ତ ଥିବା ରାଜ୍ୟ ରାଜପଥ ରାସ୍ତା ନିର୍ମାଣ ପାଇଁ 26 କୋଟି ଟଙ୍କା ବ୍ୟୟରେ କାର୍ଯ୍ୟ ଆରମ୍ଭ ହୋଇଥିଲା । ଏଥିପାଇଁ ଶତାଧିକ ଗଛକୁ କାଟି ରାସ୍ତା ପ୍ରଶସ୍ତିକରଣ କାର୍ଯ୍ୟ ଆରମ୍ଭ ହେଲା । କିନ୍ତୁ ରାସ୍ତା ନିର୍ମାଣ କାର୍ଯ୍ୟ ସ୍ଥାନରେ କୌଣସି ବିଭାଗୀୟ ଅଧିକାରୀ ବା ଯନ୍ତ୍ରୀ ଉପସ୍ଥିତ ରହୁନଥିବାରୁ ଠିକାଦାରଙ୍କ ଇଚ୍ଛାରେ ଏହି ରାସ୍ତା ନିର୍ମାଣ ହେଉଥିବା ଅଭିଯୋଗ ହୋଇଛି ।
ସେପଟେ ନିମ୍ନମାନର ରାସ୍ତା କାମ ଯୋଗୁଁ ଉକ୍ତ ରାସ୍ତାରେ ପିଚୁ କାମ ହେବାର କିଛି ଘଣ୍ଟା ମଧ୍ୟରେ ପିଚୁ ଉଠି ଯାଉଥିବା ଧଳପୁର ଗ୍ରାମବାସୀ ଅଭିଯୋଗ କରି ଉକ୍ତ ରାସ୍ତା ନିର୍ମାଣ କାର୍ଯ୍ୟ ବନ୍ଦ କରିଦେଇଛନ୍ତି । ଗ୍ରାମବାସୀ ଉକ୍ତ ରାସ୍ତାକୁ ଉପଯୁକ୍ତ ଭାବରେ ପୁନଃ ନିର୍ମାଣ ପାଇଁ ଦାବି କରିଛନ୍ତି ।
ଅନ୍ୟପଟେ ଘଟଣାକୁ ବିଭାଗୀୟ ଅଧିକାରୀ ସ୍ବୀକାର କରିବା ସହ ଥଣ୍ଡା ପିଚୁ ଯୋଗୁଁ ଏଭଳି ପରିସ୍ଥିତି ହୋଇଥିବା ତଥା ଉକ୍ତ ରାସ୍ତା ପୁନଃ ନିର୍ମାଣ କରାଯିବ ବୋଲି ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
