ବୌଦ୍ଧ: ଘରୋଇ କଳି ନେଲା ଜୀବନ । ମଦ୍ୟପ ବାପାକୁ ସାବାଡ କରିବାକୁ ଯାଇ ହତ୍ୟାକାରୀ ସାଜିଛି ପୁଅ । ବୌଦ୍ଧ ସରଣ୍ଡା ଗାଁରେ ଘଟିଥିବା ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ଅଭିଯୁକ୍ତକୁ ଅଟକ ରଖିଛି ପୋଲିସ । ଘଟଣାର ତଦନ୍ତ ଚାଲିଛି ।
ସୂଚନା ମୁତାବକ, ଗୁରୁବାର ରାତିରେ ଘଟିଛି ଏହି ଘଟଣା । ଗାଁର ସଦାଶିବ ପାତ୍ର(୪୭)ଙ୍କୁ ବଡପୁଅ ଆଶିଷ ଦୁର୍ଘଟଣାବଶତଃ ହତ୍ୟା କରିଥିବା ଅଭିଯୋଗ ହୋଇଛି । ଦୁଇ ପୁଅ, ଝିଅ, ବୁଢୀ ମା ଓ ପତ୍ନୀଙ୍କୁ ନେଇ ସଦାଶିବଙ୍କ ପରିବାର । ଛୋଟ ବ୍ୟବସାୟ କରି ଚଳୁଥିବା ସଦାଶିବ ପ୍ରତିଦିନ ମଦ ପିଇ ଘରେ ଝଗଡା କରୁଥିଲେ । ଆଉ ଗୁରୁବାରର ଏ ଝଗଡା ଉଗ୍ରରୂପ ନେଇଥିଲା । ବାପାଙ୍କୁ ସାବାଡ କରିବାକୁ ଯାଇ ପୁଅ ଆଶିଷ ମାଡ ମାରିଥିଲେ । ମାତ୍ର ଏଥିରେ ଦୁର୍ଘଟଣାବଶତଃ ସଦାଶିବଙ୍କ ମୃତ୍ୟୁ ହୋଇଥିବା ମୃତକଙ୍କ ପତ୍ନୀ କହିଛନ୍ତି ।
ସେପଟେ ଖବର ପାଇଁ ଘଟଣାସ୍ଥଳରେ ପହଞ୍ଚିଥିଲା ବୌଦ୍ଧ ପୋଲିସ । ଅଭିଯୁକ୍ତକୁ ଅଟକ ରଖିବା ସହ ଏବେ ତଦନ୍ତ ଚାଲିଛି । ପାରିବାରିକ କଳହ ଜନିତ ହତ୍ୟାକାଣ୍ଡ ବୋଲି ପ୍ରାଥମିକ ତଦନ୍ତରୁ ଜଣାପଡିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
