ବୌଦ୍ଧ: ମାସିକ ବେତନ ବୃଦ୍ଧି ଦାବିରେ ସାତ ଦିନ ହେଲା ବୌଦ୍ଧ ଜିଲ୍ଲାର ଅଙ୍ଗନବାଡି କେନ୍ଦ୍ରଗୁଡିକରେ ଅଚଳାବସ୍ଥା ଲାଗି ରହିଛି । ଏହାରି ଭିତରେ ସୋମବାର ଜିଲ୍ଲାର ସମସ୍ତ ବିଦ୍ୟାଳୟରେ ମଧ୍ୟାହ୍ନ ଭୋଜନ ରୋଷେଇ କରୁଥିବା ପାଚିକାମାନେ କାର୍ଯ୍ୟ ବନ୍ଦ କରି ଉପଯୁକ୍ତ ପ୍ରାପ୍ୟ ଦାବିରେ ରାଜରାସ୍ତାକୁ ଓହ୍ଲାଇଛନ୍ତି । ଦୈନିକ ମଜୁରୀ ବୃଦ୍ଧି ଦାବି କରି ପାଚିକା ସଂଘ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି ।
ବୌଦ୍ଧ ଜିଲ୍ଲାର ତିନୋଟି ବ୍ଲକର ଶହଶହ ପାଚକ ପାଚିକା ସୋମବାର ଏକ ବିଶାଳ ଶୋଭାଯାତ୍ରାରେ ବାହାରି ଜିଲ୍ଲା ପ୍ରଶାସନ ଜରିଆରେ ସରକାରଙ୍କୁ ଦାବିପତ୍ର ପ୍ରଦାନ କରିଛନ୍ତି । ସେମାନଙ୍କୁ ମାସିକ ମାତ୍ର ୧,୪୦୦ ଟଙ୍କା ପ୍ରଦାନ କରାଯାଉଛି । ଏଥିରେ ପରିବାର ପ୍ରତିପୋଷଣ କଷ୍ଟକର ହୋଇପଡୁଛି । ଏହାଛଡା ଚିକିତ୍ସା ଭତ୍ତା ମଧ୍ୟ ମିଳୁନାହିଁ । ସରକାର ସମସ୍ତଙ୍କ ପାଇଁ ବିଭିନ୍ନ ଯୋଜନା କରୁଥିଲେ ମଧ୍ୟ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ପ୍ରଦାନ କରୁଥିବା ପାଚିକାଙ୍କ ପାଇଁ କୌଣସି ବ୍ୟବସ୍ଥା କରିନାହାନ୍ତି । ତେଣୁ ସେମାନଙ୍କ ଦୈନିକ ମଜୁରୀ ବୃଦ୍ଧି ପାଇଁ ସଂଘ ପକ୍ଷରୁ ଦାବି କରାଯାଇଛି ।