ବୌଦ୍ଧ: ସଡକ ସୁରକ୍ଷାର ନିଆରା ବାର୍ତ୍ତା ପ୍ରଚାର କଲେ ଆରଟିଓ ଓ ଦିବ୍ୟାଙ୍ଗ । ଆରଟିଓ ଛାତ୍ରଛାତ୍ରୀଙ୍କୁ ସଡକ ସୁରକ୍ଷା ସମ୍ପର୍କରେ ବୁଝାଇବା ସହ ରାସ୍ତାରେ ଯାତାୟତ କରୁଥିବା ଗାଡି ଚାଳକଙ୍କୁ ଗୋଲାପ ଫୁଲ ଦେଇ ବୁଝାଇଥିବା ସମୟରେ ଦିବ୍ୟାଙ୍ଗ ଯୁବକ ସଚେତନତାର ବାର୍ତ୍ତା ପ୍ରଚାର କରିଥିଲେ ।
ଜିଲ୍ଲାରେ ସଡକ ସୁରକ୍ଷା ସପ୍ତାହ ଆରମ୍ଭ ହୋଇଥିବା ବେଳେ ଆରଟିଓ ଅଫିସ କର୍ମଚାରୀ ନିଆରା ଢଙ୍ଗରେ ଲୋକଙ୍କୁ ସଚେତନ କରିଥିଲେ । ବୌଦ୍ଧର ସମସ୍ତ କଲେଜର ଛାତ୍ରଛାତ୍ରୀଙ୍କୁ ସଡକ ସୁରକ୍ଷା ସମ୍ପର୍କରେ ସଚେତନତାର ପାଠ ପଢାଇଥିଲେ । ବ୍ରିଜ ଛକ ଠାରେ ବିଭାଗ ପକ୍ଷରୁ ଗାଡି ଚାଳକଙ୍କୁ ଗୋଲାପ ଫୁଲ ଓ ଚକୋଲେଟ ଦେଇ ହେଲମେଟ ପିନ୍ଧିବା ନିମନ୍ତେ ଅନୁରୋଧ କରିଥିଲେ ।
ଏହି ଅବସରରେ ଜଣେ ଦିବ୍ୟାଙ୍ଗ ଯୁବକ ବିଭିନ୍ନ ଛକରେ ବୁଲି ଲୋକଙ୍କୁ ରାସ୍ତା ଦୁର୍ଘଟଣା ସମ୍ପର୍କରେ ଲିଫଲେଟ ମାଧ୍ୟମରେ ସଚେତନ କରୁଥିବା ଦୃଶ୍ୟ ସମସ୍ତଙ୍କୁ ଆକର୍ଷିତ କରିଥିଲା ।ଏଠାରେ ସୂଚନା ଥାଉକି ବୌଦ୍ଧ ଜିଲ୍ଲାରେ ଚଳିତ ବର୍ଷ କେବଳ ରାସ୍ତା ଦୁର୍ଘଟଣାରେ ସରକାରୀ ଭାବେ 60 ରୁ ଊର୍ଦ୍ଧ୍ବ ଲୋକଙ୍କ ପ୍ରାଣହାନୀ ଘଟିଥିବା ବେଳେ ପ୍ରତ୍ୟେକ ଦିନ ଧନଜୀବନ କ୍ଷୟକ୍ଷତି ଘଟୁଛି ।
ମାତ୍ର ଏଠାରେ ଟ୍ରମାକେୟାର ସେଣ୍ଟର ନଥିବାରୁ ବହୁ ଅସୁବିଧା ମଧ୍ୟ ସୃଷ୍ଟି ହେଉଛି । ଏହାକୁ ଆରଟିଓ ନିଜେ ସ୍ବୀକାର କରିବା ସହ ଏନେଇ ସରକାରଙ୍କୁ ପ୍ରସ୍ତାବ ଦିଆଯାଇଥିବା କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
