ବୌଦ୍ଧ: ରାଜ୍ୟର କୌଣସି ପ୍ରତିଭାପୂର୍ଣ୍ଣ ଖେଳାଳି ଯେମିତି କୌଣସି ସୁବିଧା ସୁଯୋଗରୁ ବଞ୍ଚିତ ନହୁଅନ୍ତି ସେଥିପାଇଁ ରାଜ୍ୟ ସରକାର ପ୍ରତି ବ୍ଲକରେ ଆଧୁନିକ ଷ୍ଟାଡିୟମର ନିର୍ମାଣ ପାଇଁ ଗତ ଦୁଇ ବର୍ଷ ତଳେ ଘୋଷଣା କରିଥିଲେ । ଏହାସହ ଯଥା-ସମ୍ଭବ ନିର୍ମାଣ ଷ୍ଟାଡିୟମରେ ସବୁ ଭିତ୍ତିଭୂମି ଯୋଗାଇବାକୁ ନିଷ୍ପତି ନେଇଥିଲେ ।
ହେଲେ ଗତ 13 ବର୍ଷ ତଳୁ ନିର୍ମାଣ ଆରମ୍ଭ ହୋଇଥିବା ବୌଦ୍ଧ ଜିଲ୍ଲାସ୍ତରୀୟ ଷ୍ଟାଡିୟମର ଅବସ୍ଥା ଦେଖିଲେ ମନେ ହେବ ସରକାରଙ୍କ ଷ୍ଟାଡିୟମ ନିର୍ମାଣର ଘୋଷଣାରେ କେତେ ଦମ ଅଛି। କାରଣ ଏହି ଷ୍ଟାଡିୟମର ଅବସ୍ଥା ଏବେ ପୂରା ଶୋଚନୀୟ ହୋଇପଡିଛି । ଜିଲ୍ଲାର ପୁରୁଣା କଚେରୀ ଛକ ନିକଟରେ ଥିବା ଷ୍ଟାଡିୟମ ନିର୍ମାଣ 13 ବର୍ଷ ହେଲା ଚାଲିଛି ଯେ ସରିବାର ନା ଧରୁନି । କି କେବେ ସରିବ ତାର ଉତ୍ତର ମଧ୍ୟ କାହା ପାଖରେ ନାହିଁ । ଗୋଟିଏ ପାର୍ଶ୍ବ ନିର୍ମାଣ ଶେଷ ହେଲା ବେଳକୁ ଅନ୍ୟପାର୍ଶ୍ବରେ ଭାଙ୍ଗି ଯାଉଛି । ଫଳରେ କେବଳ ଏଠି ଠିକାଦାର ପୌଷମାସ ଚାଲିଥିବା ବେଳେ ଖେଳାଳି ଯେମିତି ଥିଲେ ସେମିତି ଅଛନ୍ତି ।
ଷ୍ଟାଡିୟମରେ କେଉଁଠି ପାଣି ଜମି ରହିଥିବା ବେଳେ କେଉଁଠି କୁଢକୁଢ ଅଳିଆ ଆବର୍ଜନା ଗଦା ହୋଇଛି । କୌଣସି ସୁରକ୍ଷାକର୍ମୀ ମଧ୍ୟ ନାହାନ୍ତି । ଫଳରେ ଅସାମାଜିକ ଲୋକଙ୍କ ଏହା ଏକ ସୁରକ୍ଷିତ ଜାଗାରେ ପରିଣତ ହୋଇଛି। ଏଠି ପ୍ରଶ୍ନ ଉଠୁଛି ଯଦି ଗୋଟିଏ ଷ୍ଟାଡିୟମ ନିର୍ମାଣ ପାଇଁ ବର୍ଷବର୍ଷ ଲାଗିବ କ୍ରୀଡାବିତ ନିର୍ମାଣ ପାଇଁ କେତେ ବର୍ଷ ଲାଗିବ ? ତୁରନ୍ତ ଷ୍ଟାଡିୟମର ନିର୍ମାଣ ଶେଷ କରିବା ସହ ବ୍ୟବହାର ଉପଯୁକ୍ତ କରିବା ପାଇଁ ଜନସାଧାରଣ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
