ବୌଦ୍ଧ: ଦେଶକୁ ସୁରକ୍ଷା ଦେଉଥିବା ସୈନିକଙ୍କ ଜମି ଉପରେ ମାଫିଆଙ୍କ ନଜର। ବୌଦ୍ଧ ଜିଲ୍ଲାରେ ଜମି ମାଫିଆମାନେ ଏତେ ମାତ୍ରାରେ ସକ୍ରିୟ ହୋଇଛନ୍ତି ସୈନିକଙ୍କ ପାଇଁ ଉଦ୍ଦିଷ୍ଟ ଜମିକୁ ମଧ୍ୟ ହଡପ କରିଛନ୍ତି । ପୂର୍ବରୁ ଜିଲ୍ଲାର ହରଭଙ୍ଗା, ବୌଦ୍ଧ ଓ କଣ୍ଟାମାଳ ତହସିଲ ଅଧିନରେ ଜମି ଦୁର୍ନୀତି ଚଳିତ ଶତାବ୍ଦୀର ସର୍ବବୃହତ ଦୁର୍ନୀତି ହୋଇଥିଲା । ହେଲେ ବର୍ତ୍ତମାନ ସମୟରେ ସୈନିକଙ୍କ ପାଇଁ ଉଦ୍ଦିଷ୍ଟ ସଂରକ୍ଷିତ ଜମି ଲୁଟ ଘଟଣା ସାମ୍ନାକୁ ଆସିଛି।
ବୌଦ୍ଧ ଜିଲ୍ଲାର ଜମି ଦୁର୍ନୀତିର ଚେର ଏତେ ଶକ୍ତିଶାଳୀ ଯେ ଗତ ଦୁଇ ବର୍ଷ ତଳେ ଜିଲ୍ଲା ପ୍ରଶାସନ ସରକାରୀ ଖାତାକୁ ମାଫିଆଙ୍କ କବଳରୁ ଜମି ଫେରାଇବା ମିଶନ କୌଣସି ଅଦୃଶ୍ୟ ଚାପରୁ ଫେଲ ମାରିଲା। ତତ୍କାଳୀନ ଜିଲ୍ଲାପାଳ ଓ ତହସିଲଦାର କୋଟି କୋଟି ଟଙ୍କାର ଜମିକୁ କେଉଁ ନିୟମ ଓ ଆଧାର ବଳରେ ମାଫିଆ ମାନଙ୍କୁ ପ୍ରଦାନ କଲେ, ତାର ତଦନ୍ତ ଅନ୍ଧାରରେ ରହିଥିବା ବେଳେ ଏବେ ପୁଣି ଜମି ମାଫିଆ ଜିଲ୍ଲାରେ ସକ୍ରିୟ ହୋଇଛନ୍ତି ।
ଖବର ଅନୁଯାୟୀ, ଏଭଳି ସାଂଘାତିକ ଅଭିଯୋଗ ଆସିଛି ବୌଦ୍ଧ ତହସିଲ ଅନ୍ତର୍ଗତ ଗୁନ୍ଦଳିଆ ମୌଜାର ଝାରମୁଣ୍ଡା ଗାଁ ରୁ । ଏଠାରେ ସୈନିକଙ୍କ ପାଇଁ ଉଦ୍ଦିଷ୍ଟ ଏକର ଏକର ସରକାରୀ ଜମିକୁ ବେଆଇନ ଭାବେ ଦଖଲ ତଥା ଆନ୍ଧ୍ର କପାଚାଷୀଙ୍କୁ ଲିଜ ଆକାରରେ ଦେଇ ମୋଟା ଅଙ୍କର ଅର୍ଥରାଶି ଆଦାୟ ହେଉଥିବା ଅଭିଯୋଗ ହୋଇଛି ।
ଆହୁରି ମଧ୍ୟ କପାଚାଷ ନାରେ କେତେକ ଅସାଧୁ ବ୍ୟକ୍ତି ଗଞ୍ଜେଇ ଚାଲାଣ କରୁଥିବା ମଧ୍ୟ ଚର୍ଚ୍ଚା ହେଉଛି । ଏପଟେ ଉପଜିଲ୍ଲାପାଳ ଘଟଣା ସମ୍ପର୍କରେ ଖୁବ ଶୀଘ୍ର ତଦନ୍ତ କରି ଉଚିତ୍ ପଦକ୍ଷେପ ଗ୍ରହଣ କରିବେ ବୋଲି କହିଛନ୍ତି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
