ବୌଦ୍ଧ: ଜିଲ୍ଲା ମୁଖ୍ୟ ଚିକିତ୍ସାଳୟରେ ଏବେ ଦେଖାଦେଇଛି ଘୋର ଅବ୍ୟବସ୍ଥା । ଗରମ ଓ ଗୁଳୁଗୁଳିରେ ଆଉଟୁପାଉଟୁ ରୋଗୀ । ରୋଗୀଙ୍କ ସମ୍ପର୍କୀୟ ମଧ୍ୟ ଚିକିତ୍ସାଳୟରେ ଆନୁଷଙ୍ଗିକ ବ୍ୟବସ୍ଥା ନଥିବାରୁ କଲବଲ ହେଉଥିବା ଦେଖିବାକୁ ମିଳିଛି ।
ବେଡ୍ ଅଭାବରୁ ରୋଗୀ ବାରଣ୍ଡାରେ ପଡି ଛଟପଟ ହେଉଥିବା ବେଳେ, ମେଡିକାଲରେ ପାଣି,ଲାଇଟ,ଶୌଚାଳୟ, ପଙ୍ଖା ଆଦିର କୌଣସି ବ୍ୟବସ୍ଥା ନଥିବାରୁ ସମ୍ପର୍କୀୟ ମାନେ ଅସୁବିଧା ହେଉଥିବାର ଅଭିଯୋଗ ହୋଇଛି ।
ପାରଦ ବଢି ବଢି ଜିଲ୍ଲାରେ ତାପମାତ୍ରା ୪୫ ଡିଗ୍ରୀ ଉପରେ ରହୁଥିବା ବେଳେ ମୁଖ୍ୟ ଚିକିତ୍ସାଳୟରେ ରୋଗୀ ଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି । ଏପଟେ ରୋଗୀଙ୍କ ସମ୍ପର୍କୀୟ ଙ୍କ ନିମନ୍ତେ ବିଭାଗ ପକ୍ଷରୁ କୌଣସି ବ୍ୟବସ୍ଥା ନଥିବାରୁ ଦିନ ବେଳା ତାତିଲା ଝାଞ୍ଜି ପବନରେ ସିଝୁଥିବା ବେଳେ ରାତିର ଅନ୍ଧାରରେ ସମୟ କାଟୁଛନ୍ତି ଏମାନେ ।
ମୁଖ୍ୟ ଚିକିତ୍ସାଳୟରେ ଏପରି ଅବ୍ଯବସ୍ଥାକୁ ନେଇ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଥିବା ବେଳେ ରୋଗୀଙ୍କ ସମ୍ପର୍କୀୟ ମାନଙ୍କ ମଧ୍ୟରେ ଅସନ୍ତୋଷ ବସା ବାନ୍ଧିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
