ବୌଦ୍ଧ: ସ୍ବାଧୀନତାର ୭୨ ବର୍ଷ ପରେ ମଧ୍ୟ ସରକାରୀ ସୁବିଧା ପହଞ୍ଚି ପାରିନି ବୌଦ୍ଧ ଜିଲ୍ଲାର ବିଭିନ୍ନ ଅପହଞ୍ଚ ଇଲାକାରେ । ଏହାର ସତ୍ୟାସତ୍ୟ ଜାଣିବା ପାଇଁ ଆଢେଣୀଗଡ଼ ପଞ୍ଚାୟତରେ ରହୁଥିବା ସାତୋଟି ଅପହଞ୍ଚ ଇଲାକକୁ ପହଞ୍ଚିଥିଲା ଜିଲ୍ଲା ପ୍ରଶାସନ । ଶିକ୍ଷା, ସ୍ବାସ୍ଥ୍ୟ ଓ ଗମନାଗମନ ଏକ ଅଞ୍ଚଳର ବିକାଶ ପାଇଁ ଅତ୍ୟନ୍ତ ଜରୁରୀ ହୋଇଥିବା ବେଳେ ଏସବୁଥିରୁ ବାଦ ପଡିଛି ଜଙ୍ଗଲ ମଧ୍ୟରେ ଥିବା ସାତଟି ଗାଁ ।
ଆଢେଣୀଗଡ ପଞ୍ଚାୟତର ମାଧପୁର ଠାରୁ ପ୍ରାୟ 12 କିଲୋମିଟର ଦୂର ଲକଡପାଜୁ ଓ ସାବେରୀ ଓ୍ବାର୍ଡରେ ଦେଖିବାକୁ ମିଳିଥିଲା ଲୋକଙ୍କ ବିଭିନ୍ନ ସମସ୍ୟା । ସାବେରୀ ଓ୍ବାର୍ଡ ଅଧିନରେ ମାଣ୍ଡାଲି, ଏର୍ଡାପାଜୁ ଭଳି ସାତଗୋଟି ଗାଁ ବୌଦ୍ଧ ଓ କନ୍ଧମାଳ ଜିଲ୍ଲାର ସୀମାନ୍ତ ଗାଁ, ଯାହାକି ତିନୋଟି ଜଙ୍ଗଲ ମଝିରେ ରହିଛି । ଏଠାକୁ ସମ୍ପୂର୍ଣ୍ଣ ଭାବେ ସରକାରୀ ଯୋଜନା ଓ ବିକାଶ ପହଞ୍ଚି ପାରିନଥିବା ଅଭିଯୋଗ ହୋଇଛି ।
ଅଙ୍ଗନବାଡି ଠାରୁ ଆରମ୍ଭ କରି ସ୍ବାସ୍ଥ୍ୟସେବା ପର୍ଯ୍ୟନ୍ତ ସବୁ ଏଠାରେ ଭଗବାନଙ୍କ ଭରସାରେ । ଜିଲ୍ଲାପାଳ ଲଲାଟେନ୍ଦୁ ମିଶ୍ର ଏହି ଅଞ୍ଚଳକୁ ଯାଇଥିବା ବେଳେ ସ୍ଥାନୀୟ ଲୋକେ ସେମାନଙ୍କ ମୌଳିକ ଅସୁବିଧା ସମ୍ପର୍କରେ ଗୁହାରୀ କରିଥିଲେ । ମାଧପୁର ବନାଞ୍ଚଳ ଅଧିନରେ ଥିବା ଏହି ଅପହଞ୍ଚ ଅଞ୍ଚଳକୁ ଗମନାଗମନର ସୁବିଧା ହେଲେ ବିକାଶର ଧାରା ପହଞ୍ଚି ପାରିବ ବୋଲି ବୁଦ୍ଧିଜୀବୀ ମତ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
