ବୌଦ୍ଧ: ନବ ବର୍ଷ ପୂର୍ବରୁ ପୁରୁଣା ବର୍ଷରେ ରେକର୍ଡ ସଂଖ୍ୟାରେ ନଷ୍ଟ କରାଯାଇଛି ବେଆଇନ ଗଞ୍ଜେଇ ଚାଷ । ସବୁଠାରୁ ଆଗରେ ଜିଲ୍ଲା ପୋଲିସ ରହିଥିବା ବେଳେ ତା ପଛକୁ ରହିଛି ଅବକାରୀ ବିଭାଗ । ବୌଦ୍ଧ ଜିଲ୍ଲା ପ୍ରଶାସନ ପାଇଁ ଚଳିତ ବର୍ଷ ସବୁଠାରୁ ବଡ ଚ୍ୟାଲେଞ୍ଜ ଥିଲା ବେଆଇନ ଗଞ୍ଜେଇ ଚାଷ ।
ବୌଦ୍ଧ ଜିଲ୍ଲାର ବଘିଆପଡା, ଆମ୍ବଝରୀ, ଗୁନ୍ଦୁଳିଆ, ଶଗଡା, ଟିକରପଡା, ଲମ୍ବସରୀ, ଭଳି ପଞ୍ଚାୟତର ଘଞ୍ଚ ଜଙ୍ଗଲ ମଧ୍ୟରେ ଦୀର୍ଘ ବର୍ଷରୁ ଏଭଳି ବେଆଇନ କାର୍ଯ୍ୟ ଚାଲିଥିଲା । ଜଙ୍ଗଲ ବିଭାଗର ଜ୍ଞାତସାରରେ କିମ୍ବା ଉଦାସୀନତା ଯୋଗୁଁ ଏଭଳି ବେଆଇନ ଚାଷ ଚାଲିଥିଲେ ମଧ୍ୟ କିଛି ବିଭାଗର ଅସାଧୁ କର୍ମଚାରୀଙ୍କ ସହାୟତାରେ ଏହି କାର୍ଯ୍ୟ ହେଉଥିବା ଅଭିଯୋଗ ହୋଇଛି । ଅପରପକ୍ଷରେ ଆଭ୍ୟନ୍ତରୀଣ ଅଞ୍ଚଳର ନିରୀହ ଲୋକଙ୍କୁ ଆର୍ଥିକ ପ୍ରଲୋଭନ ଦେଖାଯାଇ ସେମାନଙ୍କୁ ମୋହରା ଭଳି ବ୍ୟବହାର କରାଯାଏ । ଚଳିତ ବର୍ଷ ଶେଷ ଦିନ ସୁଦ୍ଧା ସର୍ବାଧିକ ତଥା ରେକର୍ଡ ସଂଖ୍ୟାରେ ଏହି ବେଆଇନ ଚାଷକୁ ନଷ୍ଟ କରାଯାଇଥିବା ସୂଚନା ମିଳିଛି ।
ସୂଚନାମୁତାବକ, କେବଳ ଅବକାରୀ ବିଭାଗ ପ୍ରାୟ ୮୨୬ ଏକର ଜଙ୍ଗଲ ଜମିରେ ହୋଇଥିବା ପ୍ରାୟ ୨୪ ଶହ କୋଟି ୭୮ ଲକ୍ଷ ଟଙ୍କାର ଗଞ୍ଜେଇ ଚାଷକୁ ପୋଡି ନଷ୍ଟ କରିଥିବା ବେଳେ ଜିଲ୍ଲା ପୋଲିସ ୧୮୭୧ ଏକର ଜଙ୍ଗଲ ଜମିରେ ହୋଇଥିବା ପ୍ରାୟ ୫ ହଜାର ୬୧୩ କୋଟି ଟଙ୍କାର ବେଆଇନ ଗଞ୍ଜେଇ ଚାଷକୁ ନଷ୍ଟ କରିଛି । ଯଦିଓ ବିଗତ ବର୍ଷ ତୁଳନାରେ ଏହି ପରିସଂଖ୍ୟାନ ଯଥେଷ୍ଟ ଅଧିକ ତଥାପି ଜିଲ୍ଲାର ଆହୁରି ଅନେକ ଜଙ୍ଗଲ ଅଞ୍ଚଳରେ ମଧ୍ୟ ଏହି ବେଆଇନ ଚାଷ ଅମଳ ହେବା ଆରମ୍ଭ ହୋଇଗଲାଣି ।
ଯାହାକି ଜଙ୍ଗଲ ବିଭାଗ ସହିତ ଅନ୍ୟ ବିଭାଗର କେତେକ ଅସାଧୁ କର୍ମଚାରୀଙ୍କ ସହିତ ଗଞ୍ଜେଇ ମାଫିଆ ଦର ନିର୍ଦ୍ଧାରଣ କରି ଏହି ବେଆଇନ କାର୍ଯ୍ୟକୁ ପରିପୃଷ୍ଟ କରୁଥିବା ଚର୍ଚ୍ଚା ହେଉଛି । ଏହି ବେଆଇନ କାର୍ଯ୍ୟକୁ ଦମନ କରିବା ପ୍ରକ୍ରିୟା ନୂତନ ବର୍ଷରେ ମଧ୍ୟ ଜାରି ରହିବ ବୋଲି ଏସପି ଭି. ରଘୁନାଥ ରାଓ ଓ ଅବକାରୀ ଅଧିକ୍ଷକ ଡ଼ଃ ଶାନ୍ତନୁ ଦାଶ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
