ବୌଦ୍ଧ: 57 ନଂ ଜାତୀୟ ରାଜପଥ କଡରେ ରହିଥିବା ଡାକ୍ତରଖାନା ଅଞ୍ଚଳ ଏବେ ଜବରଦଖଲକାରୀଙ୍କ କବଜାରେ । ଆମ୍ବୁଲାନ୍ସ ସେବା ଠାରୁ ଟ୍ରାଫିକ ବ୍ୟବସ୍ଥାରେ ସମସ୍ୟା ଦେଖାଦେଉଛି । ବୌଦ୍ଧ ମୁଖ୍ୟ ଚିକିତ୍ସାଳୟ ସହିତ ପୁରୁଣା କଟକ, ବାଉଁଶୁଣୀ ଓ ମନମୁଣ୍ଡା ସ୍ଥିତ ସ୍ବାସ୍ଥ୍ୟ କେନ୍ଦ୍ରରେ ମଧ୍ୟ ସମାନ ଅବସ୍ଥା ଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲା ଦେଇ 57 ନଂ ଜାତୀୟ ରାଜପଥ ଯାଇଥିବା ବେଳେ ଏହାର ଠିକ କଡରେ ବୌଦ୍ଧ ମୁଖ୍ୟ ଡାକ୍ତରଖାନା ସହିତ ପୁରୁଣାକଟକ, ବାଉଁଶୁଣୀ ଓ ମନମୁଣ୍ଡା ଡାକ୍ତରଖାନା ରହିଛି । କିନ୍ତୁ ଉକ୍ତ ଡାକ୍ତରଖାନାକୁ ଲାଗିରହିଥିବା ସ୍ଥାନଗୁଡିକ ଏବେ ଜବରଦଖଲ ହୋଇଥିବାରୁ ନାନା ସମସ୍ୟା ସୃଷ୍ଟି ହେଉଥିବାର ଅଭିଯୋଗ ହୋଇଛି ।
ଉଠା ଦୋକାନ ଓ ଗାଡିମୋଟର ପାର୍କିଂ ଯୋଗୁଁ ଏଭଳି ସମସ୍ୟା ଉପୁଜିଥିବା ଆଲୋଚନା ହେଉଛି । ବୌଦ୍ଧ ଦେଇ ଯାଇଥିବା ରାଜପଥର ଦୁଇ ପାର୍ଶ୍ଵରେ ଡାକ୍ତରଖାନାର ବିଭିନ୍ନ ବିଭାଗ ରହିଛି । ଏଣୁ ଅଧିକାଂଶ ସମୟରେ ଏହି ସ୍ଥାନରେ ଟ୍ରାଫିକ ଜାମ ସହ ଦୁର୍ଘଟଣା ଘଟିବାର ଆଶଙ୍କା ସୃଷ୍ଟି ହୋଇଥାଏ । ଡାକ୍ତରଖାନାରେ ବହୁବିଦ୍ଧ ସମସ୍ୟା ଲାଗିରହିଥିବା ବେଳେ ଜବରଦଖଲ ସମସ୍ୟା ଏବେ ସାଧାରଣ ଲୋକଙ୍କୁ ଅତିଷ୍ଠ କରିପକାଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
