ବୌଦ୍ଧ : ଜିଲ୍ଲାର ତିନୋଟି ବ୍ଲକର ୬୯ଟି ପଞ୍ଚାୟତର ଅନେକ ଗ୍ରାମରେ ଗରିବ ଅସହାୟ ତଥା ପ୍ରକୃତ ହିତାଧିକାରୀ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ ହୋଇପାରୁ ନାହାଁନ୍ତି । ବୌଦ୍ଧ ଜିଲ୍ଲାର ବିଭିନ୍ନ ପଞ୍ଚାୟତରେ ହୋଇଥିବା ଆବାସ ଯୋଜନାରେ ଦୁର୍ନୀତି ଚଳିତ ଶତାଦ୍ଦୀର ସବୁଠାରୁ ବଡ଼ ଦୁର୍ନୀତି ହୋଇଥିବା ଅଭିଯୋଗ ହୋଇଥିବା ବେଳେ ଏନେଇ ସାରା ରାଜ୍ୟରେ ଜିଲ୍ଲାକୁ ନିନ୍ଦିତ କରିଛି ।
ମୁଣ୍ଡାପଡା ପଞ୍ଚାୟତରୁ ଆରମ୍ଭ କରି ତଳଗାଁ ପର୍ଯ୍ୟନ୍ତ ଓ ନାରାୟଣପ୍ରସାଦ ଠାରୁ ଆରମ୍ଭ କରି ଟିକରପଡା ପଞ୍ଚାୟତ ପର୍ଯ୍ୟନ୍ତ ସବୁ ସ୍ଥାନରେ ଆବାସ ଯୋଜନାରେ କେଳେଙ୍କାରୀ ବିଗତ ବର୍ଷ ତମାମ ଚର୍ଚ୍ଚାର ବିଷୟ ହୋଇ ରହିଥିଲା । କେଉଁଠି ହିତାଧିକାରୀଙ୍କ ଆବାସ ଅର୍ଥ ହଡପ ତ ଆଉ କେଉଁଠି ମୃତ ବ୍ୟକ୍ତିଙ୍କ ନାମରେ ଅର୍ଥ ହଡପ ।
ଜିଲ୍ଲା ପ୍ରଶାସନ ଏନେଇ କଡା ଆଭିମୁଖ୍ୟ ଦେଖାଇବାକୁ ଯାଇ କିଛି ସରକାରୀ କର୍ମଚାରୀଙ୍କୁ ନୋଟିସ, ଛଟେଇ ଓ ଏପରିକି ଥାନାରେ ଏତଲା ମଧ୍ୟ ଦିଆଗଲା । କିନ୍ତୁ, ଫଳ ଶୂନ ଭଳି ମନେ ହେଉଛି । ଜିଲ୍ଲାରେ ଜାଗା ମିଶନ ଓ ଆବାସ ଯୋଜନାକୁ ନେଇ ମାନବାଧିକାର କର୍ମୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
