ବୌଦ୍ଧ: ଜଣେ ଦିନ ମଜୁରୀଆଙ୍କ ପୁଅ ହୋଇ ମାଟ୍ରିକ ପରୀକ୍ଷାରେ ଜିଲ୍ଲା ଟପ୍ପର ହେବା କୌଣସି କମ କଥା ନୁହେଁ । ଏହାକୁ ସତ କରି ଦେଖାଇଛନ୍ତି ହରଭଙ୍ଗା ବ୍ଲକର ଉଦୟପୁର ଗ୍ରାମର ଶରତ ସାହୁ । ପଙ୍କରୁ ପଦ୍ମ ଫୁଟିଲା ଭଳି ଗରିବ ପରିବାରର ଶରତ ଚଳିତ ବର୍ଷର ଜିଲ୍ଲା ମାଟ୍ରିକ ଟପ୍ପର ହେବାର ସୌଭାଗ୍ୟ ଅର୍ଜନ କରିଛନ୍ତି ।
ଶରତଙ୍କ ପିତା ଦାଶରଥି ସାହୁ ଓ ମା ସୁକାନ୍ତି ସାହୁ ଦିନ ମଜୁରିଆ ଭାବେ ଯାହା ଅର୍ଜନ କରନ୍ତି ତାହା ପରିବାର ପାଇଁ ନିଅଣ୍ଟ । ଏଭଳି ଅଭାବ ପରିସ୍ଥିତିରେ ପାଠ ପଢିବା ସହ ଶରତ ଜିଲ୍ଲା ସ୍ତରରେ ମାଟ୍ରିକ ଟପ୍ପର ହୋଇ ଗୌରବ ଆଣିଛନ୍ତି ।
ସୋମବାର କନ୍ଧମାଳ ସାଂସଦ ଅଚ୍ୟୁତ ସାମନ୍ତଙ୍କ ପ୍ରଥମ ବୌଦ୍ଧ ଜିଲ୍ଲା ଗସ୍ତ ଅବସରରେ ଏହି ପ୍ରତିଭାକୁ ସମ୍ବର୍ଦ୍ଧିତ କରିବା ସହ କୃତି ଛାତ୍ରର ଉଚ୍ଚ ଶିକ୍ଷା ନିମନ୍ତେ ସମସ୍ତ ସହାୟତା ଯୋଗାଇଦେବାକୁ ପ୍ରତିଶୃତି ଦେଇଛନ୍ତି ।
ଏଭଳି ପ୍ରତିଭାକୁ ଉପଯୁକ୍ତ ମାଗଣା ଉଚ୍ଚ ଶିକ୍ଷା ବ୍ୟବସ୍ଥା ଘୋଷଣାକୁ ବୌଦ୍ଧ ଜିଲ୍ଲାର ବିଭିନ୍ନ ମହଲରୁ ସ୍ବାଗତ କରାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
