ବୌଦ୍ଧ: ଜିଲ୍ଲା ପୋଲିସକୁ ମିଳିଛି ବଡ ସଫଳତା । ଏକ ଆଠ ଜଣିଆ ଡକାୟତ ଗ୍ୟାଙ୍ଗକୁ କାବୁ କରିବା ସହ ସେମାନଙ୍କଠାରୁ ଏକ ମାଉଜର, ଦୁଇଟି ଭୁଜାଲି ଓ ଏକ ଇନୋଭା କାରକୁ ପୋଲିସ ଉଦ୍ଧାର କରିଛି ।
ନାଟକୀୟ ଢଙ୍ଗରେ ଜିଲ୍ଲା ପୋଲିସ ଡକାୟତ ଗ୍ୟାଙ୍ଗଙ୍କୁ ଧରିଛି । ଭୁବନେଶ୍ୱରରୁ ବଲାଙ୍ଗୀରକୁ ବିବାହ ଭୋଜି ପାଇଁ ଏକ ଟ୍ରାଭେଲ ଏଜେଣ୍ଟଙ୍କଠାରୁ ଭଡାରେ ଈନୋଭା କାର ନେଇଥିଲେ କିଛି ଯୁବକ । ତେବେ ସେମାନେ ଫେରିବା ସମୟରେ କାରର ଡ୍ରାଇଭର ସେମାନଙ୍କର କିଛି ମନ୍ଦ ଉଦ୍ଦେଶ୍ୟ ରହିଛି ବୋଲି ଠଉରାଇ ନିଜ ମାଲିକକୁ ମୋବାଇଲରେ ମେସେଜ ପଠାଇଥିଲେ । ଏହି ଖବର ବୌଦ୍ଧ ଏସପିଙ୍କ ନିକଟରେ ପହଞ୍ଚିବା ପରେ ଜିଲ୍ଲା ପୋଲିସ ତତକ୍ଷଣାତ ତତ୍ପର ହୋଇଉଠିଥିଲା ।
ଡକାୟତ ଦଳକୁ ଧରିବା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଥିଲା । ଡକାୟତ ଦଳ କାର ସହିତ ବୌଦ୍ଧ ଜିଲ୍ଲାର ପୁରୁଣାକଟକ ଥାନା ଅତିକ୍ରମ ସମୟରେ ପୋଲିସ ଚଢ଼ାଉ କରି ଏହି ଡକାୟତ ଦଳକୁ କାବୁ କରିଥିଲା । ସମୁଦାୟ ଆଠ ଜଣ ଡକାୟତଙ୍କୁ ପୋଲିସ ଗିରଫ କରିବା ସହିତ ଗୋଟିଏ ମାଉଜର, ଦୁଇଟି ଭୁଜାଲି ସହ ଏକ ଈନୋଭା କାରକୁ ଉଦ୍ଧାର କରାଯାଇଛି । କାର ଡ୍ରାଇଭରର ଉପସ୍ଥିତ ବୁଦ୍ଧି ଓ ବୌଦ୍ଧ ପୋଲିସର ତତ୍ପରତା ଯୋଗୁଁ ଏକ ବଡ ଧରଣର ଡକାୟତି ଉଦ୍ୟମ ପଣ୍ଡ ହୋଇଛି ବୋଲି ସାଧାରଣରେ ଚର୍ଚ୍ଚା ହେଉଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
