ବୌଦ୍ଧ: ମର୍ମନ୍ତୁଦ ସଡକ ଦୁର୍ଘଟଣାକୁ ବର୍ଷେ ପୁରିଲା । ଦୁର୍ଘଟଣାର କ୍ଷତ ଧିରେ ଧିରେ ଭରିଲା ସତ କିନ୍ତୁ ଦୁର୍ଘଟଣାର ଜଖମ ମାନସିକ ଓ ଶାରୀରିକ କ୍ଷତ ଏଭଳି ଦେଇଗଲା ଯେ ସବୁଦିନ ପାଇଁ ନାବାଳକ ଛାତ୍ର ଭିନ୍ନକ୍ଷମ ହୋଇଗଲା । ଆଉ ଏବେ ଏହି ଦୁଃଖର ପାହାଡ ଲଦି ହୋଇ ପଡିଛି ବୌଦ୍ଧ ଜିଲ୍ଲା ଖୁଣ୍ଟବନ୍ଧ ମଧୁପୁର ଗ୍ରାମରେ ବାସ କରୁଥିବା ସୋମନାଥଙ୍କ ପରିବାର ଉପରେ ।
ଆଜକୁ ଠିକ ବର୍ଷେ ତଳେ ଗାଁ ଛକ ନିକଟରେ ଏକ ଭାରିଯାନ ପୁଅ କମଲର ଦୁଇ ଗୋଡ ଉପରେ ଚଢି ଗୁରୁତର ଆହତ ହୋଇଥିଲା। ଧାର ଉଧାର କରି ପୁଅକୁ ବୌଦ୍ଧ, ବୁର୍ଲା ଭଳି ଡାକ୍ତରଖାନାରେ ଚିକିତ୍ସିତ କରିଥିଲେ। ପୁଅର ଜୀବନ ବଞ୍ଚିଯାଇଛି ସତ, ହେଲେ ତିନୋଟି ପୁଅକୁ ନେଇ ଅନେକ ସ୍ବପ୍ନ ଦେଖିଥିବା ସୋମନାଥଙ୍କ ସ୍ବପ୍ନ ସେତେବେଳେ ଭାଙ୍ଗିଗଲା ଯେତେବେଳେ କମଲ ସାରାଜୀବନ ପାଇଁ ଦିବ୍ୟାଙ୍ଗ ହୋଇଗଲା ।
ଦୁଃଖ ଏତିକିରେ ସରିଲା ନାହିଁ। ଅର୍ଥାଭାବରୁ ଘରଦ୍ବାର ସୋମନାଥଙ୍କ ଭାଙ୍ଗି ଯିବାକୁ ବସିଲାଣି। କମଲ ଅଧିକ ପାଠ ପଢିବା ପାଇଁ ଇଛୁକ ଥିଲେ ମଧ୍ୟ ସ୍ବାସ୍ଥ୍ୟ ଗତ କାରଣରୁ ତାହା ସମ୍ଭବ ହୋଇପାରୁନାହିଁ । ଗୋଡର ହାଡ ଅଠର ଖଣ୍ଡ ହୋଇ ଲୁହାରଡ ଲାଗି ଥିବାରୁ କମଲର ଦୈନନ୍ଦିନ କାର୍ଯ୍ୟ ସହଜସାଧ୍ୟ ହୋଇପାରୁନାହିଁ ।
ଏପଟେ ପୁଅର ଭିନ୍ନକ୍ଷମ ଭତ୍ତା ଛାଡନ୍ତୁ, ଆଜି ଯାଏ ଦିବ୍ୟାଙ୍ଗ ତାଲିକାରେ ମଧ୍ୟ ଚିହ୍ନଟ ହୋଇପାରି ନାହିଁ। ଫଳରେ ଏବେ ଏକ ଦୁର୍ବିସହ ଜୀବନ ଯାପନ କରୁଛନ୍ତି ସୋମନାଥଙ୍କ ପରିବାର । ତୁରନ୍ତ ଏହି ପରିବାରକୁ ସରକାରୀ ସହାୟତା ପ୍ରଦାନ କରାଯିବାକୁ ସାଧାରଣରେ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
