ଭଦ୍ରକ: ଖେଳୁଥିବା ବେଳେ ପିଲାଙ୍କ ଉପରେ ଟ୍ରାକ୍ଟର ଚଢି ଜଣେ ଶିଶୁର ମୃତ୍ୟୁ ହୋଇଥିବ ବେଳେ ଅନ୍ୟ ଜଣେ ଶିଶୁ ଗୁରୁତର ହୋଇଥିବା ଜଣା ପଡିଛି । ଘଟଣାଟି ହେଉଛି ନାୟକାଣିଡିହି ଥାନା କରଞ୍ଜାଡିଆ ଗାଁର । ମୃତ ଶିଶୁ ଅଭୟ ମଳିକଙ୍କ 5 ବର୍ଷର ପୁଅ କାଳିଆ ଓ ଗୁରୁତର ଶିଶୁ ରଞ୍ଜନ ମଳିକଙ୍କ 5 ବର୍ଷର ପୁଅ ସୁକୁଟା ମଳିକ।
ସୂଚନା ଅନୁଯାୟୀ ସୋମବାର କିଛି ପିଲା ଦାଣ୍ଡରେ ଖେଳୁଥିବା ସମୟରେ ସେହି ବାଟ ଦେଇ ଯାଉଥିବା ଏକ ଧାନ ବୋଝେଇ ଟ୍ରାକ୍ଟର ପିଲାମାନଙ୍କ ଉପରେ ଚଢି ଯାଇଥିଲା । ଟ୍ରାକ୍ଟରଟି ଜଣେ ଶିଶୁର ମୁଣ୍ଡ ଉପରେ ଚଢ଼ି ଯାଇଥିବା ବେଳେ ଆଉ ଜଣେ ଶିଶୁର ଗୋଡ ଉପରେ ଚଢି ଯାଇଥିଲା। ତେବେ ଦୁର୍ଘଟଣା ଘଟାଇ ଟ୍ରାକ୍ଟର ଛାଡି ଡ୍ରାଇଭର ଘଟଣାସ୍ଥଳରୁ ଫେରାର ହେଇଯାଇଥିବା ଜଣାପଡିଛି।
ଘଟଣାସ୍ଥଳରେ କିଛି ଗାଁଲୋକେ ପିଲାମାନଙ୍କୁ ଉଦ୍ଧାର କରି ବାସୁଦେବପୁର ମେଡିକାଲକୁ ନେଇ ଆସିଥିଲେ । ହେଲେ ଡାକ୍ତର ଜଣକୁ ମୃତ ଘୋଷଣା କରିଥିବା ବେଳେ ଅନ୍ୟ ଜଣକୁ ପ୍ରାଥମିକ ଚିକିତ୍ସା ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
