ଭଦ୍ରକ: ପୁଣି ଥରେ ପୋଲିସ-ପବ୍ଲିକ ମୁହାଁମୁହିଁ । ଏମିତି ଏକ ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ପୁରୁଣା ବଜାର ଅନ୍ତର୍ଗତ ପୁରୁଣା ବଜାର ଛକରେ ।
ଘଟଣା ଅନୁସାରେ ଟ୍ରାଫିକ ନିୟନ୍ତ୍ରଣ କରିବାକୁ ଯାଇ ପୁରୁଣା ବଜାର ଥାନା ଅଧିକାରୀଣି ପ୍ରଜ୍ଞା ମହାନ୍ତି ଜଣେ କପଡା ବ୍ୟବସାୟୀଙ୍କୁ ର୍ଦୁବ୍ୟବହାର କରିବା ସହ ତାଙ୍କ ସମସ୍ତ କପଡା ଫୋପାଡି ଦେଇଥିଲେ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଯିବା ସହ ଲୋକେ ଥାନା ଅଧିକାରୀଣିଙ୍କ କାର୍ଯ୍ୟକୁ ବିରୋଧ କରି ରାସ୍ତାରୋକ କରିଥିଲେ ।
ଖାଲି ଏତିକି ନୁହେଁ ଉତ୍ୟକ୍ତ ଲୋକେ ପୋଲିସ ଉପରକୁ ଢେଲା ପଥର ମାଡ ମାରିବା ଆରମ୍ଭ କରିଥିଲେ । ପରସ୍ଥିତିକୁ ନିୟନ୍ତ୍ରଣ କରିବାକୁ ଯାଇ ପୋଲିସ ମୃଦୁ ଲାଠି ଚାଳନା କରିଥିଲା । ପୋଲିସର ଲାଠି ମାଡରେ ଅଲାଲପୁର ଅଞ୍ଚଳର ଶେଖ ରାଜୁ ଆହତ ହୋଇଥିଲେ । ଆହତ ରାଜୁଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଛି ।
ଘଟଣାର ଖବର ପାଇ ଭଦ୍ରକ ଗସ୍ତରେ ଥିବା ପୂର୍ବାଞ୍ଚଳ ଆଇଜି ଦିପ୍ତେଶ ପଟ୍ଟନାୟକ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ । ଏହାସହ ଲୋକଙ୍କୁ ଶାନ୍ତି ବଜାୟ ରଖିବା ପାଇଁ ନିବେଦନ କରିଥିଲେ ।
ପରେ ଘଟଣାର ଗୁରୁତ୍ବକୁ ଦେଖି ପୁରୁଣା ବଜାର ଥାନା ଅଧିକାରୀଣି ପ୍ରଜ୍ଞା ମହାନ୍ତିଙ୍କୁ ତୁରନ୍ତ ଜିଲ୍ଲା ପୋଲିସ ମୁଖ୍ୟାଳୟକୁ ବଦଳି କରିଥିଲେ । ତାଙ୍କ ସ୍ଥାନରେ ରତିକାନ୍ତ ଗିରିଙ୍କୁ ପୁରୁଣା ବଜାର ଥାନା ଅଧିକାରୀ ଭାବେ ଅବସ୍ଥାପିତ କରାଯାଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
