ଭଦ୍ରକ: ବିଦ୍ୟୁତ ସଂସ୍ପର୍ଶରେ ଆସି ନାବାଳକଙ୍କ ମୃତ୍ୟୁ ଘଟିଛି । ଏମିତି ଏକ ଦୁଖଦ ଘଟଣା ଘଟିଛି ଚାନ୍ଦବାଲି ବ୍ଲକ ଅନ୍ତର୍ଗତ ଚରଦିଆ ପଞ୍ଚାୟତ ଅନ୍ତର୍ଗତ ହରିଶପୁର ଗ୍ରାମରେ । ଖବର ଅନୁସାରେ, ବାଂଶଡା ଥାନା ଅଧୀନ କରଞ୍ଜମାଳ ପଞ୍ଚାୟତର ଗୌରାଙ୍ଗ ମାଝୀଙ୍କ 17 ବର୍ଷୀୟ ନାବାଳକ ପୁଅ ସଞ୍ଜୟ ମାଝୀ ମାଉସୀ ଘର ଚାରାଦିଆର ହରିଶପୁରକୁ ଯାଇଥିଲେ । ସେଠାରେ ମଉସା ପୋଖରୀରେ ଜାଲ ପକାଉଥିବା ବେଳେ ସଞ୍ଜୟ ପୋଖରୀ ହୁଡ଼ାରେ ଥିବା ଇଲେକ୍ଟ୍ରି ପୋଲର ଷ୍ଟେକୁ ଧରି ପାରି ହେଉଥିବା ସମୟରେ ବିଦ୍ୟୁତ ସଂସ୍ପର୍ଶରେ ଆସିଥିଲେ ।
ବିଦ୍ୟୁତ ଆଘାତରେ ନାବାଳକ ମୃତ
ତୁରନ୍ତ ସଞ୍ଜୟଙ୍କୁ ଉଦ୍ଧାର କରି ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣାଯାଇଥିଲା । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ବିଦ୍ୟୁତ ବିଭାଗର ଅବହେଳା ଯୋଗୁଁ ଜଣେ ନାବାଳକର ଜୀବନ ଚାଲିଗଲା ବୋଲି ଅଭିଯୋଗ କରିବା ସହିତ ଗରିବ ପରିବାରକୁ ସରକାରୀ ସହାୟତା ଯୋଗାଇଦେବାକୁ ଦାବି ହୋଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
