ଭଦ୍ରକ: ଲୁଟ କରି ଫେରାର ହେବା ସମୟରେ ଦୁର୍ଘଟଣାର ଶିକାର ହେଲେ ଦୁଇ ଲୁଟେରା । ଶୁକ୍ରବାର ଭଦ୍ରକରେ ଜଣେ ଯୁବତୀଙ୍କ ବେକରୁ ସୁନା ଚେନ ଲୁଟ ଉଦ୍ୟମ କରୁଥିବା ବେଳେ ଦୁର୍ଘଟଣାର ଶିକାର ହେଲେ ଦୁଇ ଲୁଟେରା । ଫଳରେ ଗୁରୁତର ଅବସ୍ଥାରେ ଦୁଇ ଲୁଟେରାଙ୍କୁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ, ଶୁକ୍ରବାର ଭଦ୍ରକ ଜିଲ୍ଲା 16 ନମ୍ବର ଜାତୀୟ ରାଜପଥ ଅନ୍ତର୍ଗତ ଭଣ୍ଡାରିପୋଖରୀ କୁଶଗଡ଼ିଆ ନିକଟରେ ଦୁଇ ଜଣ ଲୁଟେରା ଏକ ପଲସର ଯୋଗେ ଆସି ସ୍କୁଟିରେ ଯାଉଥିବା ଏକ ଯୁବତୀଙ୍କ ବେକରୁ ସୁନାଚେନ ଛିଣ୍ଡାଇ ନେଇଥିଲେ । ଏହାପରେ ଯୁବତୀ ଜଣକ ବହୁ ଜୋରରେ ଚିତ୍କାର କରିବାରୁ ନିକଟରେ ଥିବା କିଛି ଲୋକ ଲୁଟେରାଙ୍କୁ ଗୋଡ଼ାଇଥିଲେ ।
ଲୁଟେରାମାନେ ଲୋକଙ୍କ ଭୟରେ ଦ୍ରୁତ ବେଗରେ ବାଇକ ଚଳାଇ ଫେରାର୍ ହେବାପାଇଁ ଚେଷ୍ଟା କରୁଥିବା ବେଳେ ଭାରସ୍ୟାମ ହରାଇ ଦୁର୍ଘଟଣାଗ୍ରସ୍ତ ହୋଇଥିଲେ । ଫଳରେ ଉଭୟଙ୍କୁ ସଙ୍କଟାପନ୍ନ ଅବସ୍ଥାରେ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯିବା ସହ ସେମାନଙ୍କ ଠାରୁ ସୁନା ଚେନ୍ ଉଦ୍ଧାର କରାଯାଇଛି । ତେବେ ଦୁଇ ଲୁଟେରାଙ୍କ ଘର ଗଞ୍ଜାମ ଅଞ୍ଚଳର ବୋଲି ଜଣାପଡିଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
