ଭଦ୍ରକ: ପୂର୍ବ ଶତ୍ରୁତା କେନ୍ଦ୍ର କରି ଘରେ ଲଗାଇ ଦେଲେ ନିଆଁ । ପରିବାରର ସମସ୍ତେ ଶୋଇଥିବା ବେଳେ ଘରେ ତାଲା ପକାଇ ନିଆଁ ଲାଗାଇଦେଲେ ଦୁର୍ବୃତ୍ତ । ଅଳ୍ପକେ ବର୍ତ୍ତିଲା ୬ଜଣଙ୍କ ଜୀବନ । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ 7 ନମ୍ବର ୱାର୍ଡ ଅଞ୍ଚଳର ସୁଦର୍ଶନ ଦାସଙ୍କ ଘରେ । ଅଗ୍ନିକାଣ୍ଡରେ 5 ବଖରା ଘର ସହ ଲକ୍ଷାଧିକ ଟଙ୍କାର ସମ୍ପତ୍ତି ଜଳି ପୋଡି ପାଉଁଶ ହୋଇଯାଇଥିବା ସୂଚନା ମିଳିଛି ।
ମିଳିଥିବା ସୂଚନାଅନୁଯାୟୀ ଗତକାଲି ରାତିରେ ସୁଦର୍ଶନଙ୍କ ପରିବାରର ସମସ୍ତ ସଦସ୍ୟ ଘରେ ଶୋଇଥିବା ବେଳେ ହଠାତ ନିଆଁ ଲାଗିଯାଇଥିଲା । ନିଆଁ ଦାଉରୁ ରକ୍ଷା ପାଇବା ପାଇଁ ସମସ୍ତେ ବାହାରକୁ ପଳାଇ ଆସିବାକୁ ଚେଷ୍ଟା କରୁଥିବା ବେଳେ ଘର ବାହରପଟୁ ତାଲା ପଡିଥିବା ଜାଣିବାକୁ ପାଇଥିଲେ । ଏହା ଏପରେ ଝରକା ପଟେ ସମସ୍ତେ ବାହାରକୁ ଆସିଥିଲେ ।
ତେବେ ପୂର୍ବଶତ୍ରୁତା କାରଣରୁ କେହି ଘରେ ନିଆଁ ଲଗାଇ ଦେଇଥିବା ଥାନାରେ ଅଭିଯୋଗ କରିଛନ୍ତି ସୁଦର୍ଶନଙ୍କ ପରିବାର ଲୋକ । ଭଦ୍ରକ ସହରାଞ୍ଚଳ ଥାନାରେ ଅଭିଯୋଗ ହେବା ପରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ଜଣାପଡିଛି । ତେବେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
