ଭଦ୍ରକ: ମର୍ମନ୍ତୁଦ ସଡକ ଦୁର୍ଘଟଣା । ଭଦ୍ରକ ବନ୍ତ ବ୍ଲକ ଅନ୍ତର୍ଗତ ଟିଲୋ କେନାଲ ବନ୍ଧ ଛକରେ ରବିବାର ବିଳମ୍ବିତ ରାତିରେ ବାଇକକୁ ଧକ୍କା ଦେଲା ବାଲି ବୋଝେଇ ହାଇୱା । ଫଳରେ ବାଇକରେ ଯାଉଥିବା ଦୁଇଜଣଙ୍କ ମଧ୍ୟରୁ ଜଣେ ମୃତ ଓ ଜଣେ ଗୁରୁତର ହୋଇଥିବା ଜଣାପଡିଛି । ଫଳରେ ରାତିରେ କ୍ଷତିପୂରଣ ଦାବିରେ ସ୍ଥାନୀୟବାସିନ୍ଦା ରାସ୍ତାରୋକ କରିଥିଲେ ।
ସୂଚନାନୁଯାୟୀ ଦୁର୍ଘଟଣାରେ ବନ୍ତ ବ୍ଲକ ଓଡ଼ଙ୍ଗ ପଞ୍ଚାୟତ ଏକଜାଟିଆ ଗ୍ରାମର ପ୍ରଭାତ ମହାନ୍ତିଙ୍କ ମୃତ୍ୟୁ ହୋଇଥିଲା । ଅବିନାଶ ନାଥ ନାମକ ଏକ ବ୍ୟକ୍ତି ଗୁରୁତର ଭାବେ ଆହତ ହୋଇଥଲେ । ତେବେ ଆହତଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ଦୁର୍ଘଟଣା ଘଟାଇଥିବା ହାଇୱାକୁ ପୋଲିସ ଜବତ କରିବା ସହ ଡ୍ରାଇଭରକୁ ଅଟକ ରଖିଛି ।
ଦୁର୍ଘଟଣା ପରେ ସ୍ଥାନୀୟ ଜନସାଧାରଣ କ୍ଷତିପୂରଣ ଦାବି କରିବା ସହ ଭଦ୍ରକ-ଆନନ୍ଦପୁର ରାସ୍ତାରେ ଭାରି ଯାନ ଚଳାଚଳ ନେଇ ସମୟ ନିର୍ଘଣ୍ଟ ଦାବି କରି ବନ୍ତଠାରେ ରାସ୍ତାରୋକ କରିଥିଲେ । ଏଥିସହ ଘଟଣାସ୍ଥଳରେ ଚାପା ଉତ୍ତେଜନା ମଧ୍ୟ ପ୍ରକାଶ ପାଇଥିଲା । ପରେ ପ୍ରଶାସନ 50 ହଜାର ଟଙ୍କା କ୍ଷତିପୂରଣ ଦେବା ପାଇଁ ପ୍ରତିଶୃତି ଦେଇଥିଲେ । ଏହାସହ ଆଜିଠୁ 7 ଦିନ ପାଇଁ ସେହି ରାସ୍ତା ଦେଇ ଭାରି ଯାନ ଚଳାଚଳ ସ୍ଥଗିତ ରଖାଯାଇଛି । 7 ଦିନ ପରେ ଜିଲ୍ଲାପାଳଙ୍କ ନିଷ୍ପତ୍ତି କ୍ରମେ ପଦକ୍ଷେପ ନିଆଯିବ ବୋଲି ସୂଚନା ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
