ଭଦ୍ରକ: ଜିଲ୍ଲା ଚାନ୍ଦବାଲି ବ୍ଲକ ଓରାସାହି ସେବା ସମବାୟ ସମିତି କାର୍ଯ୍ୟାଳୟକୁ ଘେରିଲେ ଶତାଧିକ ଚାଷୀ। ତୁରନ୍ତ କୃଷି ବୀମା ଅର୍ଥ ପ୍ରଦାନ ଓ ବକେୟା ସାର ପ୍ରଦାନ ଦାବି ନେଇ ଚାଷୀ ମେଳି କରିଥିଲେ । ୨୦୧୯ ରେ ଓରାସାହି ସେବା ସମିତି ଅଧିନରେ ଥିବା ଓରାସାହି ପଞ୍ଚାୟତ, କାଣ୍ଡଗରଡି ପଞ୍ଚାୟତ ଓ ବଜୟନଗର ପଞ୍ଚାୟତ ପାଇଁ ୬୮ % କୃଷିବୀମା ଅର୍ଥ ଆସିଥିବା ଜଣାପଡିଛି। ହେଲେ ସମିତିର ସମ୍ପାଦକ ଅଦ୍ୟାବଧି ବୀମାଧାରୀଙ୍କୁ ସେମାନଙ୍କର ବୀମା ଟଙ୍କା ପ୍ରଦାନ କରୁନାହାଁନ୍ତି ବୋଲି ଅଭିଯୋଗ କରିଛନ୍ତି ଆନ୍ଦୋଳକାରୀ।
ଅନ୍ୟପଟେ, ବୀମାଧାରୀଙ୍କୁ ଚଳିତ ଖରିବ ଧାନ ଚାଷ ପାଇଁ ସାର ପ୍ରଦାନ କରୁନାହାଁନ୍ତି। ତେଣୁ ଏହି ଦୁଇଟି ଦାବୀ ନେଇ ଓରାସାହି ସେବା ସମବାୟ ସମିତିର ସମସ୍ତ ଚାଷୀ ସମିତି କାର୍ଯ୍ୟାଳୟକୁ ଘେରିଥିଲେ। ତେବେ ଚଳିତ ବର୍ଷ ପ୍ରଥମେ ମରୁଡି ପରେ ଲଘୁଚାପ ଜନିତ ଲଗାଣ ବର୍ଷା ଏବଂ ପରେ ବନ୍ୟା ଆସିବାରୁ ଚାଷୀ କୂଳଙ୍କର ଆର୍ଥିକ ସ୍ଥିତି ସମ୍ପୂର୍ଣ୍ଣ ଦୋହଲି ଯାଇଛି। ଏପରି ସ୍ଥିତିରେ ସମବାୟ ସମିତି ପକ୍ଷରୁ ବୀମା ରାଶି ପ୍ରଦାନ ନକରିବା ନେଇ ତାତିଥିଲେ ଚାଷୀ। ଓରାସାହି ସେବା ସମବାୟ ସମିତିର ସମ୍ପାଦିକା ସସ୍ମିତା ନାୟକ ଚାଷୀଙ୍କୁ ବୁଝାସୁଝା କରିବା ସହ ସେମାନଙ୍କ ଦାବିପତ୍ରକୁ ଗ୍ରହଣ କରି ତୁରନ୍ତ ଏହାର ସ୍ଥାୟୀ ସମାଧାନ କରିବାକୁ ପ୍ରତିଶୃତି ଦେବା ପରେ ଚାଷୀ ମାନେ ଶାନ୍ତ ପଡ଼ିଥିଲେ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
