ଭଦ୍ରକ: ଇସଲାମ ଧର୍ମର ସର୍ବଶ୍ରେଷ୍ଠ ମାସ ରମଜାନ । କୁରାନ ଅନୁଯାୟୀ ବର୍ଷସାରା ଭଲ କାର୍ଯ୍ୟ କଲେ ଯେତିକି ପୂଣ୍ୟ ମିଳେ, ରମଜାନ ମାସରେ ପାଳନ କଲେ ତା'ର 7 ଗୁଣା ଅଧିକ ପୂଣ୍ୟ ମିଳେ । ଚନ୍ଦରାତରୁ ଆରମ୍ଭ ହୋଇ ଇଦଚାନ୍ଦରେ ସମାପ୍ତ ହୋଇଥାଏ ଏହି ରମଜାନ ମାସ । ହେଲେ ଚଳିତ ବର୍ଷ ଲକଡାଉନ ଯୋଗୁଁ ଇଦ ଉତ୍ସବ ଭଦ୍ରକରେ ଫିକା ପଡିଯାଇଛି।
ଭାଇଚାରାର ସହର ଭଦ୍ରକରେ ବାସ କରୁଥିବା ଇସଲାମ ସମ୍ପ୍ରଦାୟର ପ୍ରତ୍ୟେକ ଲୋକେ ବେଶ ନିଷ୍ଠାର ସହ ପାଳନ କରୁଛନ୍ତି ପବିତ୍ର ରମଜାନ । ହେଲେ ଗତ ବର୍ଷ ପରି ଚଳିତ ବର୍ଷ ମଧ୍ୟ ଏଥିରେ ବ୍ୟତିକ୍ରମ ଦେଖାଯାଉଛି । କୋରୋନା ମହାମାରୀ କାରଣରୁ ସୃଷ୍ଟି ହୋଇଥିବା ପ୍ରତିକୂଳ ପରିସ୍ଥିତି ଯୋଗୁଁ ଏହି ପରିସ୍ଥିତି ସୃଷ୍ଟି ହୋଇଛି । ମସଜିଦଗୁଡିକ ଏକ ପ୍ରକାର ଶୂନଶାନ୍ ହୋଇଯାଇଛି ।
ଜାତି, ଧର୍ମ, ବର୍ଣ୍ଣ ନିର୍ବିଶେଷରେ ସମସ୍ତେ ଏହି ଇଦ ଦିନ ପରସ୍ପରକୁ ଇଦ-ମୁବାରକ ଜଣାଇବାର ପରମ୍ପରା ସହ ଭାଇଚାରା ଆଦାନ ପ୍ରଦାନ ମାହୋଲର ଦୃଷ୍ଟାନ୍ତ ଭଦ୍ରକରେ ସ୍ଵତନ୍ତ୍ର ଏବଂ ଐତିହାସିକ । ହେଲେ ଚଳିତ ବର୍ଷ କୋରୋନା କାଳରେ ଏହା ପ୍ରଭାବିତ ହୋଇଛି । ତେବେ ଏହି ଅବସରରେ ସରକାରଙ୍କ ସମସ୍ତ କୋଭିଡ ଗାଇଡ଼ଲାଇନକୁ ମାନି ଇଦ ଉତ୍ସବ ପାଳନ କରିବା ପାଇଁ ଭଦ୍ରକ ବିଧାୟକ ସଞ୍ଜୀବ ମଲ୍ଲିକ ଅପିଲ କରିଛନ୍ତି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
