ଭଦ୍ରକ: ବାତ୍ୟା ପରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ବିପଦ ସଙ୍କେତ ଉପରେ ପ୍ରବାହିତ ହେଉଛି ବୈତରଣୀ ନଦୀ । ଆଖୁଆପଦା ନିକଟରେ ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଛି । ତେଣୁ କଣ୍ଟୀଘାଇ ଏସକେପ ଦେଇ ବନ୍ୟା ପାଣି ଆସିଥିବାରୁ ରାସ୍ତାର ଦୁଇ ପାର୍ଶ୍ବରେ ବନ୍ୟା ଜଳ ପ୍ରବାହିତ ହେଉଛି ।
ତେବେ ବନ୍ୟା ଜଳ ପ୍ରଭାବରେ ଭଣ୍ଡାରିପୋଖରୀ ବ୍ଲକରେ ଥିବା ରହଣିଆ, ନପଙ୍ଗ, ମାଳଦା, ବାଲିପୋଖରୀ, ସୋଲପୁର, ରଞ୍ଜିତ ଆଦି 7 ଟି ପଞ୍ଚାୟତର 30 ଟି ଗ୍ରାମ ପ୍ରଭାବିତ ହୋଇଛି । ଏଥିସହ ସରତା ପୋଲ ଉପରେ 4 ଫୁଟ ପାଣି ଚାଲିଛି । ଫଳରେ ଭଣ୍ଡାରିପୋଖରୀ-ଯାଜପୁର ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ସେହିପରି କନକେଇ ଓ ବାଲିପୋଖରୀ ଏସକେପ ଦେଇ ବନ୍ୟା ପାଣି ଆସିଛି । ଫଳରେ ଧାମନଗର ବ୍ଳକରେ ଥିବା ଦୋବଲ, ପଧାନୀ, ଆନନ୍ଦପୁର, ଖଡିପଦା ଓ ଦଳାଙ୍ଗ ପଞ୍ଚାୟତର 20 ଟି ଗ୍ରାମ ପ୍ରଭାବିତ ହୋଇଛି । ଏଥିସହ ଗେଙ୍ଗୁଟି ନଦୀ ଉପରେ ଦୋବଲ ନିକଟରେ ଥିବା ପୋଲ ଉପରେ 3 ଫୁଟ ପାଣି ଚାଲିଛି ।
ସେହିପରି ଧାମନଗର-ଯାଜପୁର ମଧ୍ୟରେ ଯୋଗାଯୋଗ ମଧ୍ଯ ବିଚ୍ଛିନ୍ନ ହୋଇଯାଇଛି । ପ୍ରଶାସନ ପକ୍ଷରୁ ସମସ୍ତ ବନ୍ୟା ପରିସ୍ଥିତିକୁ ମୁକାବଲା କରିବା ପାଇଁ ସତର୍କ ଦୃଷ୍ଟି ରଖାଯାଇଥିବା ଜଣାପଡିଛି । ଅନ୍ୟ ପକ୍ଷରେ ବିପନ୍ନମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
