ଭଦ୍ରକ: ପୋଲିସ ଇନଫର୍ମର ସନ୍ଦେହରେ କୋଇଲା ମାଫିଆଙ୍କ ଦ୍ୱାରା ଯୁବକଙ୍କୁ ମରଣାନ୍ତକ ଆକ୍ରମଣ । ତାଙ୍କ ମୋବାଇଲ ଛଡାଇ, ସେଥିରେ ଥିବା ସ୍ଵାମୀ-ସ୍ତ୍ରୀଙ୍କ, ବ୍ୟକ୍ତିଗତ ଫୋଟ ଓ ଭିଡିଓକୁ ଭାଇରାଲ କରୁଥିବା ଅଭିଯୋଗ ହୋଇଛି । ନ୍ଯାୟ ପାଇଁ ଭଦ୍ରକ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିକଟରେ ଗୁହାରୀ କରିଛନ୍ତି ଯୁବକ ।
ଖବର ଅନୁଯାୟୀ ଭଦ୍ରକ ଜିଲ୍ଲା ସାବରଙ୍ଗ ଥାନା ଇଚ୍ଛାପୁର ଅଞ୍ଚଳର ଜଣେ ବ୍ୟକ୍ତି ଦୋଳସାହିରୁ ଘରକୁ ଫେରୁ ଥିବାବେଳେ 8/10 ଜଣ କୋଇଲା ମାଫିଆ ଆସି ତାଙ୍କୁ ମରଣାନ୍ତକ ଆକ୍ରମଣ କରିଥିବା ନେଇ ତାଙ୍କ ପତ୍ନୀ ସାବରଙ୍ଗ ଥାନାରେ ଲିଖିତ ଅଭିଯୋଗ କରିଛନ୍ତି । ସମ୍ପୃକ୍ତ ବ୍ୟକ୍ତିଙ୍କୁ କୌଣସି କାରଣ ନଥାଇ ରାସ୍ତାରେ ଅଟକାଇ ଆକ୍ରମଣ କରିବା ସହିତ 13 ହଜାର ଟଙ୍କା ଏବଂ ଏକ ଦାମି ମୋବାଇଲ ଛଡାଇ ନେଇଥିବା ଅଭିଯୋଗରେ ଉଲ୍ଲେଖ କରିଛନ୍ତି ମହିଳା ଜଣକ । ଏଥିସହ ମୋବାଇଲରେ ଥିବା ସମସ୍ତ ବ୍ୟକ୍ତିଗତ ଫୋଟ ଓ ଭିଡିଓକୁ ଅନ୍ୟମାନଙ୍କୁ ଦେଇ ଭାଇରାଲ କରିବା ସହ ଧମକ ଦେଉଥିବା ଅଭିଯୋଗ ହୋଇଛି ।
ତେବେ ମାମଲାର ଅଭିଯୁକଙ୍କୁ ଏପର୍ଯ୍ୟନ୍ତ ପୋଲିସ ଗିରଫ କରିନପାରିବାରୁ ମହିଳା ଜଣକ ଭଦ୍ରକ ଏସପିଙ୍କ ଦ୍ବାରସ୍ଥ ହୋଇଛନ୍ତି । ଏସପି ତାଙ୍କ ଅଭିଯୋଗ ଶୁଣିବା ପରେ ଖୁବଶୀଘ୍ର ଅଭିଯୁକ୍ତକୁ ଗିରଫ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି । ହେଲେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ ମିଳିପାରିନାହିଁ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
