ଭଦ୍ରକ: ସଠିକ ସମୟରେ ଆସିଲାନି 108 ଆମ୍ବୁଲାନ୍ସ । ବାଟରେ ଅଟକିଲା ଘରୋଇ ଆମ୍ବୁଲାନ୍ସ । ଏପରି ଘଟଣା ଦେଖିବାକୁ ମିଳିଛି ଚାନ୍ଦବାଲି ବ୍ଲକରେ । ସୂଚନା ଅନୁଯାୟୀ ଚାନ୍ଦବାଲି ବ୍ଳକ ମହୁଲିଆ ପଞ୍ଚାୟତର ବିନୋଦ ସାହୁ ଘରୋଇ କଳିରୁ ବିଷ ପିଇ ଗୁରୁତର ହୋଇପଡ଼ିବାରୁ ତାଙ୍କୁ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା ।
ପରେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସରକାରଙ୍କ 108 ଆମ୍ବୁଲାନ୍ସ ଆସିବା ବିଳମ୍ବ ହେବାରୁ ରୋଗୀଙ୍କ ପରିବାର ଲୋକେ ଏକ ଘରୋଇ ଆମ୍ବୁଲାନ୍ସରେ ଭଦ୍ରକ ନେଇଥିଲେ । ତେବେ ଅଧାବାଟରେ ଚାନ୍ଦବାଲି ବଜାରରେ ଆମ୍ବୁଲାନ୍ସର ଯାନ୍ତ୍ରିକ ତ୍ରୁଟି ହେବାରୁ ଏକ ଘଣ୍ଟା ଧରି ରୋଗୀ ସେହି ଘରୋଇ ଆମ୍ବୁଲାନ୍ସରେ ମରଣ ସହ ସଂଘର୍ଷ କରୁଥିଲେ ।
ତେବେ କିଛି ସମୟ ପାଇଁ ସ୍ଥାନୀୟବାସୀ ସେହି ଘରୋଇ ଆମ୍ଭୁଲାନ୍ସକୁ ରାସ୍ତା ମଧ୍ୟରେ ସାହାଯ୍ୟର ହାତ ବଢାଇଥିଲେ । ମାତ୍ର ଆମ୍ବୁଲାନ୍ସଟି ଆଉ ଚାଲିନଥିଲା। ପରେ ଏକ ଘଣ୍ଟା ବିଳମ୍ବରେ 108 ଆମ୍ବୁଲାନ୍ସ ପହଞ୍ଚିବା ପରେ ରାସ୍ତା ମଧ୍ୟରୁ ରୋଗୀଙ୍କୁ ଉଦ୍ଧାର କରି ଭଦ୍ରକ ସ୍ଥାନାନ୍ତର କରାଯାଇଥିବା ଜଣାପଡିଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
