ବରଗଡ: ଆସନ୍ତା ୨୧ ତାରିଖରେ ହେବାକୁ ଯାଉଛି ବିଜେପୁର ଉପନିର୍ବାଚନ। ଏଥିପାଇଁ 3 ପ୍ରମୁଖ ଦଳ ଶାସକ ବିଜେଡି, ବିରୋଧି ବିଜେପି ଏବଂ କଂଗ୍ରେସ ପକ୍ଷରୁ ଦଳୀୟ ପ୍ରାର୍ଥୀ ନିର୍ବାଚନ ମୈଦାନକୁ ଓହ୍ଲାଇ ପାର୍ବଣ ସମୟରେ ପ୍ରଚାରକୁ ଜୋରଦାର କରିଛନ୍ତି । ତେବେ ବିଜେପୁର ଫାଇଟ୍ ରାଜ୍ୟରେ କ୍ଷମତାସୀନ ବିଜେଡି ପାଇଁ ଏକ ଚାଲେଞ୍ଜ ଭାବେ ଛିଡା ହୋଇଛି।
ବିଜେପୁର ଉପନିର୍ବାଚନ ପାଇଁ କଂଗ୍ରେସରୁ ଦିଲ୍ଲୀପ ପଣ୍ଡା, ବିଜେଡିରୁ ପୂର୍ବତନ ବିଧାୟିକା ରୀତା ସାହୁ ପ୍ରାର୍ଥୀ ହୋଇଛନ୍ତି । ଅନ୍ୟପଟେ ବିଜେପି ପକ୍ଷରୁ 2019 ବିଧାନସଭା ନିର୍ବାଚନରେ ପ୍ରାର୍ଥୀ ହୋଇଥିବା ସନଥ ଗଡତିଆଙ୍କ ଉପରେ ପୁଣିଥରେ ଭରସା କରିଛି ଦଳ । ତେବେ ସମସ୍ତ ଦଳ ଏବେ ନିର୍ବାଚନ ପ୍ରଚାରରେ ମାତିଛନ୍ତି । ହାତୀ କାହା ମୁଣ୍ଡରେ ସୁନାକଳସ ଢାଳିବା ଭଳି ବିଜେପୁରବାସୀ କାହାକୁ ନିଜର ପ୍ରତିନିଧି ରୂପେ ବାଛିବେ ତାହା ଉପରେ ରହିଛି ନଜର ।
ରାଜ୍ୟର ସାମ୍ପ୍ରତିକ ରାଜନୈତିକ ଦୃଶ୍ୟପଟକୁ ଅନୁଧ୍ୟାନ କରିଲେ ଏହା ସ୍ପଷ୍ଟ ଯେ ଲଗାତାର ଭାବେ ବିଜେପୁର ନିର୍ବାଚନମଣ୍ଡଳୀରେ ଦୁଇ ଦୁଇ ଥର ଉପନିର୍ବାଚନ ଅନୁଷ୍ଠିତ ହୋଇଛି । 2018ରେ ସେତେବେଳର କଂଗ୍ରେସ ବିଧାୟକ ସୁବଳ ସାହୁଙ୍କ ଦେହାନ୍ତ ପରେ ଏଠାରେ ଉପନିର୍ବାଚନ ଅନୁଷ୍ଠିତ ହୋଇଥିଲା । ଏହି ନିର୍ବାଚନରେ ବିଧାୟକଙ୍କ ପତ୍ନୀ ପତ୍ନୀ ରିତା ସାହୁ ବିଜେଡିରୁ ପ୍ରାର୍ଥୀ ହୋଇ ବାଜିମାତ୍ କରିଥିଲେ।
ଗତ ସାଧାରଣ ନିର୍ବାଚନରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ନିଜର ପାରମ୍ପରିକ ଆସନ ହିଞ୍ଜିଳିକାଟୁ ସହ ବିଜେପୁରରୁ ନିର୍ବାଚନ ଲଢି ଉଭୟ ଆସନରୁ ନିର୍ବାଚିତ ହୋଇଥିଲେ । ଭାରତୀୟ ସମ୍ବାଧାନିକ ବ୍ୟବସ୍ଥା ଅନୁସାରେ କୌଣସି ନିର୍ବାଚିତ ଜନପ୍ରତିନିଧି ଏକକାଳୀନ ଏକାଧିକ ଆସନ କିମ୍ବା ଗୃହରେ ପ୍ରତିନିଧିତ୍ବ କରିପାରିବେ ନାହିଁ ।
ଏହି ନିୟମ ଅନୁସାରେ ନବୀନ ପଟ୍ଟନାୟକ ବିଜେପୁର ଆସନରୁ ନିର୍ବାଚିତ ହେବା ପରେ ଏଠାରୁ ଇସ୍ତଫା ଦେଇଥିଲେ । ଏହାର ପ୍ରଭାବ ସ୍ବରୂପ ଲୋକଙ୍କ ମଧ୍ୟରେ ବିଜେଡି ପ୍ରତି ଧୀରେ ଧୀରେ ଆସ୍ଥା ତୁଟିବାରେ ଲାଗିଥିବା ରାଜନୈତିକ ମହଲରେ ଚର୍ଚ୍ଚା ହେଉଛି । ତେବେ ବିଜେଡି କେମିତି ବିଜେପୁର ନିର୍ବାଚନ ବୈତରଣୀ ପାର ହେଉଛି ତାହା ଦେଖିବାକୁ ବାକି ରହିଲା।
ବରଗଡରୁ ରାଜେଶ ସରାପ୍, ଇଟିଭି ଭାରତ
