ବରଗଡ଼: ରାଜ୍ୟରେ ପ୍ରସବ ଜନିତ ମୃତ୍ୟୁକୁ ରୋକିବା ପାଇଁ ରାଜ୍ୟ ସରକାର ନାନା ଯୋଜନା ଆରମ୍ଭ କରିଛନ୍ତି । ଗର୍ଭବତୀ ମହିଳାଙ୍କୁ ଆଶା ଦିଦି ଜରିଆରେ ପୃଷ୍ଟିସାର ଖାଦ୍ୟ ଯୋଗେଇଦେବା ଠାରୁ ଆରମ୍ଭ କରି ସମସ୍ତ ପ୍ରକାରର ସରକାରୀ ସ୍ବାସ୍ଥ୍ୟ ସେବା ଯୋଗେଇବାର ବ୍ୟବସ୍ଥା ମଧ୍ୟ କରିଛନ୍ତି ସରକାର । ହେଲେ ସରକାରୀ ଡାକ୍ତରଖାନା ମାନଙ୍କରେ ନିଯୁକ୍ତି ପାଇଥିବା ନର୍ସ ଖୋଦ ମାନୁ ନାହାଁନ୍ତି ସରକାରଙ୍କ ନିଷ୍ପତି । ଏଭଳି ମନୋଭାବ ଯୋଗୁଁ ବିପଦର ସମ୍ମୁଖୀନ ହେଉଛନ୍ତି ପ୍ରସୂତି । ପଦ୍ମପୁର ସରକାରୀ ଡାକ୍ତରଖାନାରେ ଦେଖିବାକୁ ମିଳିଛି ଏପରି ଘଟଣା ।
ପଦ୍ମପୁର ଉପଖଣ୍ଡ ବୋଡ଼ାସମ୍ବର ଚିକିତ୍ସାଳୟକୁ ଟେମରି ଗ୍ରାମର ପ୍ରସୂତିଙ୍କୁ ନେଇ ଆଶାକର୍ମୀ ପହଞ୍ଚିଥିଲେ । ମହିଳାଙ୍କ ପ୍ରସବ ଯନ୍ତ୍ରଣା ବଢ଼ି ଚାଲିଥିବାବେଳେ ଡାକ୍ତରଖାନାରେ ଦାୟିତ୍ବରେ ଥିବା ନର୍ସ ଜୟନ୍ତୀ ପଣ୍ଡା ପ୍ରସୂତିଙ୍କୁ ସାହାଯ୍ୟ କରିବା ପାଇଁ ମନା କରିଦେଇଥିଲେ । ନର୍ସ ଜଣକ ଥକିଯାଇଥିବାରୁ ସେ ଯାଇପାରିବେ ନାହିଁ ବୋଲି ଚିତ୍କାର କରିଥିଲେ । ଆଶାକର୍ମୀ ଦେବକୀ ବାରିକ ଓ ପ୍ରସୂତିଙ୍କ ପରିବାର ଲୋକଙ୍କୁ ଦୁର୍ବ୍ୟବହାର ମଧ୍ୟ କରିଥିଲେ ।
ସେପଟେ କିନ୍ତୁ ବିନା ଡାକ୍ତର ଏବଂ ନର୍ସଙ୍କ ଅନୁପସ୍ଥିତିରେ ମହିଳାଙ୍କ ପ୍ରସବ ହୋଇଯାଇଥିଲା । ଡାକ୍ତରଖାନାରେ ଗର୍ଭବତୀ ମହିଳା ଜଣଙ୍କ ଉପସ୍ଥିତ ରହି ମଧ୍ୟ କୌଣସି ଚିକିତ୍ସାର ସହାୟତା ପାଇପାରିଲେ ନାହିଁ । ସେପଟେ ପରିବାର ଲୋକ ଉପସ୍ଥିତ ଥିବାରୁ ଅଳ୍ପକେ ବର୍ତ୍ତିଯାଇଛି ନବଜାତ ଶିଶୁର ଜୀବନ ।
ପରିବାର ଲୋକେ ଏନେଇ ଡାକ୍ତରଖାନା ମୁଖ୍ୟ ଅଧିକାରୀ ଏବଂ ଜିଲ୍ଲାପାଳଙ୍କ ନିକଟରେ ଅଭିଯୋଗ ଜଣାଇଛନ୍ତି । ତେବେ ବରଗଡ଼ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ଏହି ସମ୍ବେଦନଶୀଳ ଘଟଣାକୁ ଗୁରୁତର ଭାବେ ନେବା ସହ ଦୋଷୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପରିବାର ଲୋକଙ୍କୁ ଆଶ୍ବାସନା ଦେଇଛନ୍ତି ।
ବରଗଡ଼ରୁ ରାଜେଶ ସରାପ୍, ଇଟିଭା ଭାରତ
