ବରଗଡ: ହତ୍ୟାକାଣ୍ଡ ଘଟଣାରେ ପୋଲିସର ଅବହେଳା ଅଭିଯୋଗ ନେଇ ଥାନାରେ ଗ୍ରାମବାସୀଙ୍କ ତୁମୁଳକାଣ୍ଡ । ଏପରି କିଛି ଅଭାବନୀୟ ଘଟଣା ଦେଖିବାକୁ ମିଳିଛି ବରଗଡ ଭେଡେନ ଥାନାରେ । ପୋଲିସ ଓ ଗ୍ରାମବାସୀଙ୍କ ମଧ୍ୟରେ ସଂଘର୍ଷରେ ଉଭୟ ପକ୍ଷରୁ ଆହତ ହୋଇଥିବା ସୂଚନା ମିଳିଛି ।
ସୂଚନା ଅନୁଯାୟୀ ଗତ ଜୁଲାଇ 18 ତାରିଖରେ ଭେଡ଼େନ ଥାନା ଅନ୍ତର୍ଗତ ବୁର୍ଦା ଗ୍ରାମର ଜଣେ ୨୩ ବର୍ଷୀୟ ଜିତୁ ନାଏକ ନାମକ ଯୁବକଙ୍କ ମୃତଦେହ ନିକଟସ୍ଥ ଏକ ସ୍ଥାନରେ ମିଳିଥିଲା । ତେବେ ପରିବାର ଲୋକେ ଏହା ଏକ ପ୍ରେମ ଜନିତ ହତ୍ୟାକାଣ୍ଡ ବୋଲି ଅଭିଯୋଗ କରିଥିଲେ । ଏବଂ ପୂର୍ବରୁ ହତ୍ୟା ଧମକ ଦେଇଥିବା ଝିଅ ପରିବାର ଲୋକଙ୍କ ନାମରେ ଥାନାରେ ଅଭିଯୋଗ ମଧ୍ୟ ଆଣିଥିଲେ ।
ପୋଲିସ କିନ୍ତୁ ଏହି ଦିଗରେ କୌଣସି ତଦନ୍ତ କରୁନଥିବାରୁ ମୃତ ଜିତୁ ନାଏକଙ୍କ ପରିବାର ଲୋକେ ଏସପିଙ୍କୁ ମଧ୍ୟ ଅଭିଯୋଗ କରିଥିଲେ । କିନ୍ତୁ ତାପରେ ମଧ୍ୟ ପୋଲିସର ନିଷ୍କ୍ରିୟତା ଓ ଅବହେଳା କାରଣରୁ ଆଜି ବୁରଦା ଗ୍ରାମର ଶତାଧିକ ଲୋକେ ଭେଡ଼େନ ଥାନାକୁ ଘେରାଉ କରିଥିଲେ । ତେବେ ଉତ୍ୟକ୍ତ ଗ୍ରାମବାସୀଙ୍କ ସହିତ ପୋଲିସର ତିକ୍ତତା ଦେଖାଯାଇଥିଲା । ଗ୍ରାମବାସୀଙ୍କ ଟେକା ମାଡରେ ପୋଲିସ କର୍ମଚାରୀମାନେ ଆହତ ହୋଇଥିବାବେଳେ ବହୁ ଗ୍ରାମବାସୀ ମଧ୍ୟ ପୋଲିସର ଲାଠିମାଡରେ ଆହତ ହୋଇଥିବା ଜଣାପଡିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
