ବରଗଡ: ପ୍ରକୃତ ହିତାଧିକାରୀଙ୍କୁ ମିଳୁନି ପ୍ରଧାନମନ୍ତ୍ରୀ ଆବାସ ଯୋଜନା । ସରକାରୀ ଯୋଜନାରେ ଘରଟିଏ ପାଇଁ ବହୁ ଗରିବଙ୍କୁ ଦେବାକୁ ପଡୁଛି ହାତଗୁଞ୍ଜା । ନହେଲେ ମିଳୁନାହିଁ ପ୍ରଧାନମନ୍ତ୍ରୀ ଆବାସ ଯୋଜନା । ଏପରି ଅଭିଯୋଗ ଆସୁଛି ବରଗଡ ଜିଲ୍ଲା ପାଇକମାଳ ବ୍ଲକ ଅଞ୍ଚଳରୁ ।
ଏମିତି ଏକ ଦୃଷ୍ଟାନ୍ତ ପାଇକମାଳ ବ୍ଲକ କାଂସଡା ଗ୍ରାମ ପଞ୍ଚାୟତ ବରପାଳି ଗ୍ରାମରେ ଦେଖିବାକୁ ମିଳିଛି । ଉକ୍ତ ଗ୍ରାମର ଉଦେ ମହାନନ୍ଦ ଜଣେ ଗରିବ ବ୍ୟକ୍ତି । 6 ମାସ ତଳେ ଗ୍ରାମ ପଞ୍ଚାୟତ ପିଅନ ଆସି ଉଦେଙ୍କଠାରୁ ପ୍ରଧାନମନ୍ତ୍ରୀ ଆବାସ କରାଇ ଦେବା ନେଇ ଆଧାର କାର୍ଡ, ଭୋଟର କାର୍ଡ, ବ୍ୟାଙ୍କ ପାସବୁକ୍ ଜେରକ୍ସ କପି ସହ 1 ହଜାର ଟଙ୍କା ନେଇଥିଲେ । ଅବଶିଷ୍ଟ 9 ହଜାର ଟଙ୍କା କାର୍ଯ୍ୟାଦେଶ ପାଇଲା ପରେ ଦେବାକୁ କହିଥିଲେ । ତାଙ୍କୁ ଇଓ ପଠାଇଛନ୍ତି ବୋଲି ସେ କହିଥିଲେ । ଏହାସହ ଶୀଘ୍ର ପୁରୁଣା ଘର ଭାଙ୍ଗି ନୂଆ ଘର ତିଆରି ପାଇଁ ପ୍ରସ୍ତୁତ ରୁହ କହି ଟଙ୍କା ଓ କାଗଜପତ୍ର ଧରି ପିଅନ ଜଣକ ଫେରି ଯାଇଥିଲେ ।
ମାତ୍ର ଦୀର୍ଘ ଦିନ ପର୍ଯ୍ୟନ୍ତ ଆବାସର କାର୍ଯ୍ୟାଦେଶ ନମିଳିବାରୁ ଉଦେ ଗ୍ରାମ ପଞ୍ଚାୟତ କାର୍ଯ୍ୟାଳୟ ଯାଇଥିଲେ । ସେଠାରେ ସେ ଯାହା ଶୁଣିଲେ ତାଙ୍କ ହୋସ ଉଡିଗଲା । 20 ହଜାର ଟଙ୍କା ବିନିମୟରେ ତାଙ୍କର ଘର ଅନ୍ୟ ଜଣଙ୍କ ନାମରେ କାର୍ଯ୍ୟାଦେଶ ଦିଆଯାଇଥିବା କୁହାଯାଇଥିଲା ।
ତେବେ ପ୍ରଧାନମନ୍ତ୍ରୀ ଆବାସ ଘର ତିଆରି ଆଶାରେ ସେ ପୁରୁଣା ଘର ଭାଙ୍ଗି ଦେଇଛନ୍ତି । ଏବେ ବର୍ଷା ଋତୁରେ ବାହାରେ ରହିବା ତାଙ୍କ ପାଇଁ ମୁସ୍କିଲ ହୋଇ ଯାଇଛି । ଏ ସଂକ୍ରାନ୍ତରେ ପାଇକମାଳ ଗୋଷ୍ଠି ଉନ୍ନୟନ ଅଧିକାରୀଙ୍କୁ ଉଦେ ଜଣାଇଥିଲେ ମଧ୍ୟ କୌଣସି ସୁଫଳ ନ ମିଳିପାରିନି । ଏନେଇ ଆଗକୁ ଅନଶନ କରିବାକୁ ବାଧ୍ୟ ହେବି ସେ ବୋଲି ଚେତାବନୀ ଦେଇଛନ୍ତି ।
ବରଗଡରୁ ରାଜେସ ସରାପ, ଇଟିଭି ଭାରତ
