ବରଗଡ଼: ପୌରପରିଷଦ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲର ଅବଧି ଶେଷ ହୋଇଛି । ଆଜି(ସୋମବାର) ପ୍ରାର୍ଥୀପତ୍ର ଦାଖଲର ଶେଷ ଦିନ ଥିଲା । ସମସ୍ତ ଦଳ ଶେଷ ଦିନରେ ନିଜନିଜର ସମର୍ଥିତ ପ୍ରାର୍ଥୀଙ୍କ ସହ ଆସି ନାମାଙ୍କନ ପତ୍ର ଦାଖଲ କରିଛନ୍ତି । ବରଗଡ ପୌରପରିଷଦରେ ୧୯ଟି ୱାର୍ଡ ରହିଛି । ଅଧ୍ୟକ୍ଷା ଆସନ ପାଇଁ ପ୍ରମୁଖ ରାଜନୈତିକ ଦଳ କଂଗ୍ରେସ, ବିଜେପି ଓ ବିଜେଡିର ପ୍ରାର୍ଥୀମାନେ ନାମାଙ୍କନ ଦାଖଲ କରିଛନ୍ତି ।
ତା ସହିତ ଆମ୍ ଆଦମୀ ପାର୍ଟି ମଧ୍ୟ ୪ଟି ୱାର୍ଡରେ କାଉନସିଲର ପଦ ପ୍ରାର୍ଥୀ ଦେଇଛି । ପୌର ପରିଷଦ ଅଧ୍ୟକ୍ଷା ପଦବୀ ପାଇଁ ମଧ୍ୟ AAP ପକ୍ଷରୁ ପ୍ରାର୍ଥିନୀ ନାମାଙ୍କନ ପତ୍ର ଦାଖଲ କରିଛନ୍ତି । ବରଗଡ ପୌରପରିଷଦ ନିର୍ବାଚନ ପାଇଁ ମୋଟ ୬୯ ଜଣ କାଉନସିଲ ପ୍ରାର୍ଥୀ ଓ ପ୍ରାର୍ଥିନୀ ନାମାଙ୍କନ ପତ୍ର ଦାଖଲ କରିଛନ୍ତି । ସେହିଭଳି ପୌରପରିଷଦ ଅଧ୍ୟକ୍ଷା ଆସନ ପାଇଁ ୧୨ ଜଣ ପ୍ରାର୍ଥିନୀ ପ୍ରାର୍ଥୀପତ୍ର ଦାଖଲ କରିଛନ୍ତି ।
ଅଧ୍ୟକ୍ଷା ପଦବୀ ପାଇଁ ମୋଟ ୧୨ ଜଣଙ୍କ ମଧ୍ୟରୁ ୭ଜଣ ସ୍ଵାଧୀନ ପ୍ରାର୍ଥିନୀ ନାମାଙ୍କନ ପତ୍ର ଦାଖଲ କରିଛନ୍ତି । ତା ସହିତ ୬୯ କାଉନସିଲର ପ୍ରାର୍ଥୀଙ୍କ ମଧ୍ୟରୁ କେବଳ ୬ଜଣ ପ୍ରାର୍ଥୀ ସ୍ଵାଧୀନ ଭାବରେ ନାମାଙ୍କନ ଦାଖଲ କରିଛନ୍ତି । ପଞ୍ଚାୟତ ନିର୍ବାଚନରେ ସଫଳତା ହାସଲ କରିବା ପରେ ଏବେ ବିଜେଡି ଏଠାରେ ପୌର ନିର୍ବାଚନରେ ସଫଳ ହେବାନେଇ ଆଶା ରଖିଛନ୍ତି ପ୍ରାର୍ଥୀ ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
