ବରଗଡ: କମାଲ କଲେ ବରଗଡ ଜଗବନ୍ଧୁଦାସ ମହିଳା ମହାବିଦ୍ୟାଳୟର ଛାତ୍ରୀ । ଅନ୍ୟ କଲେଜର ପିଲାଙ୍କୁ ପଛରେ ପକାଇଲେ ମଫସଲିଆ ଅଞ୍ଚଳର 5 ଛାତ୍ରୀ । + 3 କଳା ପରୀକ୍ଷାରେ ଟପ 10ରେ ରହିଛନ୍ତି 5 ଜଣ । ସମ୍ବଲପୁର ବିଶ୍ବବିଦ୍ୟାଳୟ ଅଧିନସ୍ଥ କଲେଜ ମାନଙ୍କ ମଧ୍ୟରେ ଏହି ମହାବିଦ୍ୟାଳୟର ଛାତ୍ରୀ କୃତିତ୍ବ ହାସଲ କରିଛନ୍ତି । ଗ୍ରାମାଞ୍ଚଳର ଝିଅ ହୋଇ ମଧ୍ୟ ସହରାଞ୍ଚଳର ଝିଅଙ୍କୁ ଦେଇଛନ୍ତି ଟକ୍କର ।
ପ୍ରଥମ ଥର ଏହି ମହାବିଦ୍ୟାଳୟର ଛାତ୍ରୀ ଟପ ଲିଷ୍ଟରେ ସ୍ଥାନ ପାଇଛନ୍ତି । ଯାହାକୁ ନେଇକଲେଜ ସମେତ ସାରା ଜିଲ୍ଲା ଆଜି ଗର୍ବ କରୁଛି । ମଫସଲିଆ ଅଞ୍ଚଳରେ ରହିଥିବା ମହିଳା ମହାବିଦ୍ୟାଳୟରେ ପାଠପଢି ପଶ୍ଚିମ ଓଡିଶାର ସମସ୍ତ ଛାତ୍ରୀମାନଙ୍କୁ ପଛରେ ପକାଇ ନିଜ ଅଞ୍ଚଳର ନାମ ଉଜ୍ଜ୍ବଳ କରିଛନ୍ତି ଏମାନେ ।
2017 ରେ ମହାବିଦ୍ୟାଳୟ ଆରମ୍ଭ ହୋଇଥବା ବେଳେ ମାତ୍ର 3 ବର୍ଷ ମଧ୍ୟରେ ଭଲ ରିଜଲ୍ଟ କରିଛି ଏହି ମହାବିଦ୍ୟାଦଳୟ । ଗୋଟିଏ କି ଦୁଇଟି ନୁହେଁ 5 ଛାତ୍ରୀ ଟପ୍ କରିଛନ୍ତି । ଯାହା ଅନ୍ୟମାନଙ୍କ ପାଇଁ ସୃଷ୍ଟି କରିଛି ଉଦାହରଣ ।
ପାଠ ପଢିବାର ଇଚ୍ଛା ଥିଲେ ଉପାୟ ଆପେ ଆପେ ଆସେ । ଆଉ ଦୃଢ ଇଚ୍ଛାଶକ୍ତି ସଫଳତା ଆଣିଦିଏ । ଯାହା ଜଗବନ୍ଧୁଦାସ ମହିଳା ମହାବିଦ୍ୟାଳୟର ଛାତ୍ରୀଙ୍କୁ ଦେଖିଲେ ବାରି ହୋଇ ପଡୁଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
