ବରଗଡ: ହୀରାକୁଦ ବନ୍ଧ ନିର୍ମାଣ ସମୟରେ ହୋଇଥିବା ବିସ୍ତାପିତଙ୍କୁ ପୁଣି ବିସ୍ଥାପନର ଭୟ ଘାରିଛି । ବରଗଡ ଜିଲ୍ଲା ଅତାବିରା ବ୍ଲକ ପାହାଡଶ୍ରୀଗିଡାର ୧୧ ଗୋଟି ପରିବାର ଜିଲ୍ଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି।
ହୀରାକୁଦ ବନ୍ଧ ଦ୍ଵାରା ବିସ୍ଥାପିତ ହୋଇ ବାପଅଜା ଅମଳରୁ ପାହାଡଶ୍ରୀଗିଡା ଗ୍ରାମରେ ଘରଦ୍ଵାର କରି ରହିଆସୁଥିଲେ ବହୁ ପରିବାର । ସେମାନେ ରହୁଥିବା ଜମିକୁ ଉକ୍ତ ଗ୍ରାମର ଜଣେ ବ୍ୟକ୍ତି ନିଜ ଜମି କହି ବେଦଖଲ କରିବାକୁ ଚେଷ୍ଟା କରୁଥିଲେ । ଏହାସହ ସେମାନେ ରହୁଥିବା ୭୭ ଡିସିମିଲ ଜମିରୁ ୩୦ ଡିସିମିଲ ବିକ୍ରି କରିଦେବାରୁ ସମସ୍ତ ଘର ଖାଲି କରାଇବାକୁ ଯାଇ ଗୋଟେ ଘରକୁ ଜୋର ଜବରଦସ୍ତି ଭାଙ୍ଗି ଦିଆଯାଇଛି ।
ତେବେ ଅତାବିରା ଥାନାରେ ଏନେଇ ଅଭିଯୋଗ କରାଯାଇଥିଲେ ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ନିଆନଯିବାରୁ ବାଧ୍ୟ ହୋଇ ଗ୍ରାମର 11 ଗୋଟି ପରିବାର ବାସସ୍ଥାନ ହରାଇବା ଭୟରେ ଜିଲ୍ଲାପାଳଙ୍କୁ ଦାବିପତ୍ର ଦେଇ ଏହାର ପ୍ରତିକାର କରିବାକୁ ଅନୁରୋଧ କରିଛନ୍ତି । ତେବେ ଏହାର ସମାଧାନ ନହେବା ପର୍ଯ୍ୟନ୍ତ ସେମାନେ ଜିଲ୍ଲାପାଳ ଅଫିସରୁ ଯିବେ ନାହିଁ ବୋଲି ଆଜି ମଧ୍ୟ ଜିଲ୍ଲାପାଳ ଅଫିସ ଆଗରେ ବସି ରହିଥିଲେ ।
ବରଗଡରୁ ରାଜେସ ସରାପ, ଇଟିଭି ଭାରତ
