ବରଗଡ: ଜିଲ୍ଲାରେ ଖରିଫ ଫସଲ ପରେ ରବି ଫସଲ ଆରମ୍ଭ ହୋଇଗଲାଣି ହେଲେ ସରକାରଙ୍କ ଟୋକନ ବ୍ୟବସ୍ଥା ଯୋଗୁଁ ଆଜି ପର୍ଯ୍ୟନ୍ତ ଖରିଫ ଫସଲର ଧାନ ସଂଗ୍ରହ ଶେଷ ହୋଇନାହିଁ | ଖରିଫ ଫସଲର ଧାନ ସଂଗ୍ରହ ପ୍ରକ୍ରିୟା ଦୁଇ ମାସ ବିତି ଯାଇଥିଲେ ସୁଦ୍ଧା ଚାଷୀଙ୍କ ଧାନ ପଡିରହିଛି । ସେମାନେ ନା ବିକ୍ରି କରିପାରୁଛନ୍ତି ନା ରବି ଫସଲ ଆରମ୍ଭ କରିପାରୁଛନ୍ତି । ଫଳରେ ଚାଷୀ ମାନେ ଧାନ ବିକ୍ରି କରିନପାରି ଆନ୍ଦୋଳନକୁ ଓହଲ୍ଲାଇଛନ୍ତି |
ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଲଖମରା କଲେଜ ଛକ ଠାରେ ଆଜି (ସୋମବାର) ବହୁ ଚାଷୀ ରାସ୍ତା ଉପରେ ଶହ ଶହ ବସ୍ତା ଧାନ ପକାଇ ରାସ୍ତାରୋକ ଆନ୍ଦୋଳନ କରିଥିଲେ | ଲଖମରାର ୩୦୦ ଚାଷୀଙ୍କ ପଞ୍ଜୀକରଣ ହୋଇନଥିବା ବେଳେ ପଞ୍ଜୀକୃତ ଚାଷୀଙ୍କ ମଧ୍ୟ ଧାନ ବିକ୍ରି ହୋଇପାରିନାହିଁ | ଏ ନେଇ ପ୍ରଶାସନକୁ ଜଣାଇଥିଲେ ମଧ୍ୟ କୌଣସି ସୁଫଳ ନମିଳିବାରୁ ଏଠାକାର ଚାଷୀ ମାନେ ନିଜର କଷ୍ଟ ଅର୍ଜିତ ଧାନ ସବୁ ବିକ୍ରି କରିନପାରି ରାସ୍ତା ଉପରେ ଧାନ ପକାଇ ଆନ୍ଦୋଳନ କରିବାକୁ ବାଧ୍ୟ ହୋଇଥିବା କହିଥିଲେ |
ତେବେ ଚାଷୀ ମାନେ ନିଜର ଧାନ ସବୁ ରାସ୍ତା ଉପରେ ଅବରୋଧ କରି ରଖିବାରୁ ଦିନସାରା ଲଖମରା ରାସ୍ତାରେ ଯାନବାହାନ ଚଳାଚଳ ଠପ୍ ହୋଯାଇଥିଲା । ଜିଲ୍ଲାପ୍ରଶାସନ ପକ୍ଷରୁ ଚାଷୀଙ୍କ ଧାନ ସବୁ ବିକ୍ରି କରାଯିବ ବୋଲି ପ୍ରତିଶ୍ରୁତି ଦେବା ପରେ ଯାଇ ଚାଷୀମାନେ ଆନ୍ଦୋଳନରୁ ଓହରିଥିଲେ |
ବରଗଡ଼ରୁ ରାଜେଶ ସରାପ, ଇଟିଭି ଭାରତ
