ବରଗଡ: ଜିଲ୍ଲାରେ ଚାଷୀଙ୍କ ସମସ୍ୟା ଦିନକୁ ଦିନ ବଢ଼ିବାରେ ଲାଗିଛି । ଜିଲ୍ଲାର ବିଭିନ୍ନ ମାର୍କେଟ ୟାର୍ଡ଼ ଓ ଚାଷୀଙ୍କ ଘରେ ପାଖାପାଖି 3 ଲକ୍ଷ କୁଇଣ୍ଟାଲ ଧାନ ପଡିରହିଥିବା ବେଳେ ପ୍ରଶାସନ ଟୋକନ ଫେରିଯାଇଥିବା ଦେଖାଇ ଧାନ ଉଠାଉନଥିବା ଅଭିଯୋଗ ଆଣିଛନ୍ତି ଚାଷୀ ।
ସୂଚନା ଅନୁଯାୟୀ ଗତକାଲି ଭେଡେନ ବ୍ଲକ ପପଙ୍ଗା ମାର୍କେଟ ୟାର୍ଡ଼ରୁ ବହୁ ଚାଷୀ ଜିଲ୍ଲାପାଳଙ୍କ ନିକଟକୁ ଆସି ଆନ୍ଦୋଳନ ପାଇଁ ଚେତାବନୀ ଦେଇ ଯାଇଥିବା ବେଳେ ଆଜି ସେହି ଭେଡେନ ବ୍ଲକ ରେଶମ, ସାଲେପାଲି ଓ ପ୍ରଧାନପାଲି ଗ୍ରାମର ଶତାଧିକ ଚାଷୀ ଆନ୍ଦୋଳନରେ ବସିଛନ୍ତି ଜିଲ୍ଲାପାଳଙ୍କ ଅଫିସ ଆଗରେ । ସୂଚନାଥାଉକି ବରଗଡ଼ ଜିଲ୍ଲାରେ ୨୨୦୦ ଚାଷୀଙ୍କ ଟୋକାନ ଫେରିଯାଇଥିବାରୁ ଚାଷୀ ନିଜ କଷ୍ଟ ଉପାର୍ଜିତ ଧାନ ସବୁ ବିକ୍ରି କରିନପାରି ଆନ୍ଦୋଳନ ପାଇଁ ସଜବାଜ ହେଉଛନ୍ତି । ଗୋଟିଏ ପଟେ ମୌସୁମୀ ବର୍ଷା ଆରମ୍ଭ ହୋଇ ଚାଷୀ ଖରିଫ ଫସଲ ପାଇଁ ପ୍ରସ୍ତୁତ ହେବାକୁ ଥିବା ବେଳେ ଏ ପର୍ଯ୍ୟନ୍ତ ଗତ ରବି ଫସଲର ଧାନ ବିକ୍ରି କରିପାରିନାହିଁ । ନାଁ ହାତରେ ପଇସା ଅଛି ନାଁ ପୁଣି ଚାଷ କରିବା ପାଇଁ ଆଉ ଇଛା ଅଛି ଚାଷୀର । ନିଜ କଷ୍ଟ ଉପାର୍ଜିତ ଧାନ ଯଦି ବିକ୍ରି ନହେଲା ଆଉ ଚାଷ କଣ ପାଇଁ କରିବ ଚାଷୀ ।
ଆସନ୍ତା ୩୦ ତାରିଖ ସୁଦ୍ଧା ଚାଷୀଙ୍କ ଧାନ ବିକ୍ରି ସମସ୍ୟାର ସମାଧାନ ନହେଲେ ସମସ୍ତ ସରକାରୀ ଅଫିସ ମାନଙ୍କରେ ଚାଷୀ ଧାନ ପକାଇ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ।
ବରଗଡରୁ ରାଜେଶ ସରାପ,ଇଟିଭି ଭାରତ
