ବରଗଡ: ନକଲି ବିଦେଶୀ ମଦ ସହିତ ଲକ୍ଷାଧିକ ଟଙ୍କା ଜବତ । ବରଗଡରେ ନକଲି ବିଦେଶୀ ମଦ କାରବାର ଚଳାଇଥିବା ଏକ ରେକେଟକୁ ଧରିବାରେ ସଫଳ ହୋଇଛି ବରଗଡ ପୋଲିସ | ବରଗଡ ଭଟଲି ରୋଡ ଆଶା କିରଣ ନିକଟରେ ମାତୃ ବିହାରଠାରେ ଏକ ଘରକୁ ଚଢାଉ କରି ପୋଲିସ ବିପୁଳ ପରିମାଣରେ ନକଲି ମଦ ଏଥିରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ ।
ସୂଚନା ଅନୁଯାୟୀ ବରଗଡରେ ରହୁଥିବା ଝାଡଖଣ୍ଡ ରାଜ୍ୟର ଅବିନାଶ କୁମାର ଗୁପ୍ତା ଏବଂ ବଲାଙ୍ଗୀରରେ ରହୁଥିବା ଝାଡଖଣ୍ଡ ଶତୃଘ୍ନ ପ୍ରସାଦ ଗୁପ୍ତା ଉଭୟ ମିଶି ନକଲି ବିଦେଶୀ ମଦ ପ୍ରସ୍ତୁତ କରି ଦୀର୍ଘ ଦିନରୁ କାରବାର କରି ଆସୁଥିଲେ | କୌଣସି ସୂତ୍ରରୁ ପୋଲିସ ଏହାର ଖବର ପାଇ ବରଗଡରେ ରହୁଥିବା ଅବିନାଶକୁ କାବୁ କରିଥିଲା ଏବଂ ତଦନ୍ତ ପରେ ପ୍ରକୃତ ଘଟଣା ସାମନାକୁ ଆସିଥିଲା | ସେମାନଙ୍କ ପାଖରୁ ନଗଦ ୨୮ଲକ୍ଷ ଟଙ୍କା, ନକଲି ଷ୍ଟିକର, ନିଶା ବଟିକା ଏବଂ ୮୫ ବୋତଲ ନକଲି ବିଦେଶୀ ମଦ ଜବତ ହୋଇଛି । ଏହି କାରବାରରେ ସମ୍ପୃକ୍ତ ଦୁଇ ଜଣ ଆସାମୀଙ୍କୁ ଗିରଫ କରିଛି |
ସେମାନଙ୍କ ବିରୋଧରେ ବରଗଡ ଟାଉନ ଥାନାରେ ମାମଲା ରୁଜୁ ହୋଇଥିବା ବେଳେ ବଲାଙ୍ଗୀରରେ ଗିରଫ ହୋଇଥିବା ଶତ୍ରୁଘ୍ନ ପ୍ରସାଦ ଗୁପ୍ତା ନାମରେ ଗତ ବର୍ଷ ବରଗଡ ଥାନାରେ ଏକ ମାମଲା ରହିଛି । ତେବେ କେତେ ବର୍ଷ ହେଲା ଏହି କାରବାର ଚାପିଥିଲା ଏବଂ ଆଉ କିଏ କିଏ ଏହି ବେପାରରେ ସମ୍ପୃକ୍ତ ଅଛନ୍ତି ସେନେଇ ଆହୁରି ତଦନ୍ତ ଚାଲିଥିବା ବରଗଡ ଏସପି ପଦ୍ମିନୀ ସାହୁ କହିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
